Navenda Nûçeyan- Serok Mesûd Barzanî îro, 06.07.2020, daxuyanîyek derbarê rewş, alozî û herwiha xwepêşandanên li Iraqê belav kir û ragihand, “Em gelek dilgiran in derbarê pêşketinên tundî û bûyerên xwînî yên çend rojên derbasbûyî li Bexda û Necefê” û herwiha tekez kir, “Em gelek bi tundî şermezarîya xwînrijandin, kuştin û bikaranîna tundutîjîya li dijî xwepêşanderan dikin.”

Serok Barzanî di peyama xwe de daxwaz ji hikûmeta Iraqê dike rê li ber xwînrijandinê bigire û jîyana hemwelatî û xwepêşanderan biparêze. Serok Barzanî dibêje, “Em daxwaz dikin hikûmeta Iraqê û dam û dezgehên fermî û peywendîdar erkên xwe yên ji bi rêlibergirtina xwînrijandin û parastina jîyana hemwelatîyan û xwepêşanderan bicih bikin.”

Herwiha Serok Barzanî bi pêwîstî dizane ku, “Alîyên sîyasî ji bo gihiştina çareserîyê, bi zimanê eqil û mentîq muamele li gel vê qeyrana kûr bikin ku rû li Iraqê girtîye.”

Di dewama daxuyanîya xwe de Serok Barzanî piştevanîya xwe ji bo daxwazên rewa yên xwepêşanderan û hemwelatîyan dûpat kirin û serxweşî “li kesukarên qurbanîyan û şehîdên bûyerên vê dawîyê yên li Iraqê” kirin û hêvîya başbûna bi lez ji bo birîndaran xwest.

Li bajarên Iraqê xwepêşandan ev bi mehan e berdewam in û şeva derbasbûyî jî li Necefê alozî û tundûtûjiuê rû da ku di encamê de 13 xwepêşanderan canê xwe ji dest dan û 127 kesên din jî birîndar bûn.