Biryar e îro Wezîrê Berevaniya Îtalyayê li gel Serokwezîrê Herêma Kurdistanê Mesrûr Barzanî jî bicive.

Rola Îtalya di çarçoveya Hevpeymaniya Navdewletî ya Dijî DAIŞê de, alîkarî û hemahengî di navbera Wezareta Berevaniya Îtalya û Wezareta Pêşmerge de û mana hêzên Îtalya li Herêma Kurdistanê, mijarên serekî yên gotûbêjên navbera Wezîrê Berevaniyê yê Îtalya û berpirsên Herêma Kurdistanê ne.

Wezîrê Berevaniyê yê Îtalya li twittera xwe wêneyê serdana xwe bo cem serbaz û şêwirmendên serbazî yên Îtalyayê li Hewlêrê belav  kirine û ragihandiye, serdana wî ji bo tekezkirina li ser peyama piştevaniya Îtalya bo hevpeymanên xwe ye.

Lorenzo Guerini, Wezîrê Berevaniya Îtalyayê êvara duh bi serdanekê gihîşt Hewlêrê û li Firokexaneya Navdewletî ya Hewlêrê ji aliyê Wezîrê Pêşmerge yê Herêma Kurdistanê Şoreş Îsmaîl ve hat pêşwazîkirin.

Guerini roja Dûşemê 28ê Îlona 2020an bi serokatiya şandekê serdana Bexdayê kiribû û ligel Serokwezîrê Iraqê Mistefa Kazimî civiyabû û piştevaniya welatê xwe ji bo Iraqê tekez kiribû.

Li gor daxuyaniyeke Ofîsa Ragihandina Serokwezîrê Iraqê, di civînê de gotûbêj li ser xurtkirina hemahengiya di navbera Iraq û Italiya de di warên asayîş û perwerdekirina hêzên Iraqî û pîşesaziya leşkerî de hatiye kirin

Wezîrê Berevaniya Îtalyayê berî niha di 21ê Çileya 2020an de serdana Hewlêrê kiribû.

Herêma Kurdistanê û Îtalya xwedî peywendiyên dostane ne û Îtalya piştî sala 2014an nêzîkî 1,400 şêwirmendên leşkerî li Iraqê bicih kir, ku 800 kes ji wan şêwirmendên leşkerî li Herêma Kurdistanê ne û rahênanê bi hêzên Pêşmerge dikin.

Heta niha zêdeyî 15,000 Pêşmerge ji aliyê şêwirmendên leşkerî yên Îtalyayê ve perwerdeya leşkerî dîtine