Di berdewamiya birêveçûna Kongreya 14an a Partiya Demorkata Kurdistanê (PDK) de ku îro li Duhokê dest pê kir, Serokê PDKê û du cîgirên serokê partiyê hatin hilbijartin.

Li gor zanyariyên ji nav kongreyê, Serok Mesûd Barzanî careke din wek Serokê PDKê hat hilbijartin.

Herwiha Nêçîrvan Barzanî wek Cîgirê Yekem ê Serokê PDKê û Mesrûr Barzanî jî wek Cîgirê Duyem ê Serokê PDKê hat hilbijartin.

Li gor zanyariyên nûçegihanê Rûdawê, piştî ku Serok Barzanî careke din wek Serokê PDKê hat hilbijartin, Nêçîrvan Barzanî weke cîgirê xwe pêşniyar kir û pêşniyar ji aliyê kongreyê ve hat qebûlkirin. Piştre jî Nêçîrvan Barzanî, pêşniyar kir ku Mesrûr Barzanî weke cîgirê duyem ê serokê partiyê were diyarkirin û kongreyê jî bi pesendkirina wê pêşniyarê biryar da ku Mesrûr Barzanî bibe cîgirê duyem.

Ev cara yekem e ku PDK ji bo serokatiya partiyê du cîgiran diyar dike, lewra divê rêziknameya partiyê were guhertin û ew mijar têde were bicihkirin.

Endamê Kongreya 14 a PDKê û Parêzgarê Hewlêrê Omêd Xoşnaw ji Rûdawê re ragihand, desthilatên serok û cîgirên wî, herwiha desthilatên polîtboru û serkirdayetiyê di nava rêziknameya partiyê de hatiye diyarkirin û dê dengdan li ser bê kirin.

Îro piştî 12 salan, PDKê kongreya xwe ya 14an bi beşdariya 1020 endaman li bajarê Duhokê dest pê kir û kongre dê 3 rojan dom bike.

Li gor zanyariyên Rûdawê, 180 kes ji bo endamtiya serkirdayetiya PDKê bûne berbijêr ku 40 kes ji wan dê ji bo encûmena serkirdayetiyê bên hilbijartin.