Serokê Tevgera Gorranê ya Başûrê Kurdistanê Newşîrwan Mistefa di 19ê Gulanê 2017ê di saet 08:00ê serê sibê koça dawî kir. Newşîrwan Mistefa kanser bû û 73 salî bû. Li Ingilterê tedawî didît û berê çend rojan ji Londrayê vegerîyabû Sileymanîyê.

Newşîrwan Mistefa di 2009ê de ji YNK veqetîyabû û bi navê Gorranê tevgerekê avakiribû û Tevgera wî di hilbijartina dawî ya Herêma Kurdistanê de bibû duyem û 24 parlamenter bi dest xistibû.

Jiyana wî
Newşîrwan Mistefa sala 1944 li Taxa Serşeqam ya bajarê Silêmaniyê ji dayik bibû û xwendina xwe ya seretayî, navendî û amadeyî li Silêmaniyê bi dawî kiribû.

Sala 1967ê li Fakuleta Zanistên Siyasî ya Zanîngeha Bexdayê xwendina xwe berdewam kiriye û lîsans wergirtiye.

Newşîrwan Mistefa di destpêka salên 1960î ya sedsala bihorî de, dest bi çalakiyên siyasî kiriye û yekemîn rawestgeha jiyana wî ya siyasî di Yekîtiya Xwandekarên Kurdistanê de bûye. Di navbera salên 1963 û 1964 de bûye endamê Sekretariya Yekîtiya Xwandekarên Kurdistanê.

Sala 1967ê bûye endamê şaxa Silêmaniyê ya Partiya Demokrata Kurdistanê-Baskê Polîtboruyê.

Herwiha di sala 1969ê de xwedî îmtiyazê Kovara Rizgarî bûye.

Di destpêka salên 1970î de çûye Nemsayê û masternameya xwe di Yasaya Navdeweltî li wî welatî bi dest xistiye.

Yek ji damezrênerên Yekîtiya Niştimaniya Kurdistanê ye û heta sala 2006ê Cîgirê Sekreterê Giştî yê Yekîtiya Niştimaniya Kurdistanê bûye.

Di sala 2006ê de dest ji karê hizbî di nav refên YNKê de anî û paşê şîrketa Wûşe (bi wateya peyv) damezrand.

Di sala 2009ê de ji bo hilbijartinên parlamentoya Kurdistanê lîstek bi navê Gorran pêk anî.

Xwediyê çendîn pirtûkan di warê siyasî, dîrokî û edebiyatê de ye.

Sala 1981ê jiyana hevjîniyê pêk aniye û bavê du kuran bi navê Nima û Çiya û keçekê bi navê Çira ye.

Di 17.03.2017ê hevjîna Newşîrwan Mistefa, Şûle Elî Seîd jî wefat kiribû.