Komîsyonê Zîndanan ê Merkezê ÎHDyî pare kerd ke serra 2020î de 49 tepişteyî bêtedbîrîye ra merdî û hîşyar kerd ke eke mesele biba giranêr çareserîye nêafirîyena.

Komîsyonê Zîndanan ê Merkezê Komeleya Heqanê Merdiman (ÎHD) seba ke verê mergê tepişteyan bêro girewtene û heqê ciwîyayîşî bipawîyo kombîyayîşêko çapemenîye kerd. Hemserekê ÎHDyî Ozturk Yurkdogan û îdarekarê ÎHDyî tewrê kombîyayîşî bîyî.

Hemserekê ÎHDyî Ozturk Turkdoganî eşkera kerd ke vurnayîşê qanûnê înfazî yo ke nîsana 2020î de kewt dewre verê cîyakerîye akerd û lîderê rêxistinanê sûcî vera dîyayî û rojnameger, avûkatî zî tede tepişteyê sîyasîyî vera nêdîyayî. Turkdoganî lîderê mafya Alaattîn Çakici dima ke vera dîya sîyasetmedaran rê gefî wendî.

Endama Komîsyonê Zîndanan Dîlane Ateş zî da zanayene ke heqê cuye yê tepişteyan nêpawîyeno û vat: ''Meseleyê tepişteyan ê nêweşan zêdîyenî û benê giranêr. Zîndanan de hezar û 564 tepişteyê nêweşî estê 591ê înan rewşa ci giran a. La seke ma zanenê na hûmara zêdîyena. Zîndanan de pakîye nêna kerdene. Qanûnê înfazî ra dima 4 tepişteyê nêweşê ke serra înan 70 ra zêdêr bîye, merdî. Serra 2020î de zîndananê Tirkîya de 49 tepişteyî merdî.''