Platformê Ziwanê Kurdî Tora Ziwanî û Kulturê Kurdî wesîleya 21ê Sibate Roja Ziwanê Maye ya Dinya ra beyanatêko pîya day.

Beyanatê Platformê Ziwanê Kurdî û Tora Ziwanî û Kulturê Kurdî cêr de yo:

Peynîkerdişê kampanyaya 21ê Sibate ra pey lazim o semedê heqê ziwanê Kurdî xebatî dewam
bikerî.

Ziwanê ma estbîyayîş, nasname û rûmetê ma yo. Ganî ma nê ercanê xo her tim îfade
bike û dubare bike. Meseleya ziwanî ganî her wext mîyanê siyaset û cematê Kurdan de rojdem
bo. Ma na bawerîye de yê ke, rengê siyasetî û cematê Kurdî her tim gereke Kurdewar bo. Seba
ney sedeman Platformê Ziwanê Kurdî û Tora Ziwanî û Kulturê Kurdî pîya qirar dayê ke pîya
xebatan bikê, karê xo qordîne bikê û her sazî hetê xo ra, xebata xo semedê heqê ziwanê Kurdî
hîra biko. Ganî ma pîya semedê ziwanê Kurdî xebatan bike û meseleya ziwanê Kurdî rojdem
de bitepîşe, mîyanê cematê Kurdan de, mîyanê hêzanê serdestan de û muxalefetê Tirkîya de
bierze rojdemê siyasetî.

Platformê Ziwanî û Torê Ziwanî do siyasetê Kurdan ra biwazê ke Newroza serra 2022 bibo
Newroza ziwanê Kurdî. Tena şaristanêk de ney, heme cayanê ke Newroze tede yena pîroz
kerdene de gere meseleya ziwanê Kurdî bingehîn bo. Gere siyasetmedarî derheqê ziwanî de
qiseykerdişan bikê, roşnvîrî, nuştoxî, şaîrî, Seydayî û hunermendî zî meydanê Newrozan de
meseleya ziwanî ser o qiseykerdişan bikê. Eke heme kesî na mesela ser o qisey bikê, şarê Kurd
do na perse biko; Şima wazenê ziwanê Kurdî bibo ziwanê perwerdeyî û ziwanê fermî? Bi
vengêko berz no waştiş do bibo sey referandûmêk semedê heqê ziwanê Kurdî. Ma na bawerîye
de yê ke, ma do bi milyon vengan bîyarê pê.

Heto bîn ra xebate û çalakîyanê roja 8 ê Adare de ma do eynî waştişan dubare bike. tîya de zî
do cinîyê Kurdan do waştişê “ziwanê Kurdi bibo ziwanê perwerdeyî û ziwanê fermî” sey
referandûmêk bidê raydayene. Erê kerdişê nê waştişî do zaf waran de moralê şarî û xebatkaranê
ziwanê Kurdî berz biko.

Sey Platform û Tor ma wazenê şûbeyanê xo heme şaristananê Kurdistanî û metropolan de zêde
bike. Hereketêkê ziwanî awan bike. Ganî xebata ziwanî her ca de hîra bibo. Her sazî kişta xo ra
xebatan biko, hetkarî bido yewbînan û xebata xo biresno dorûveranê cîya bi cîyayan.
Bi medya Kurdî reyde têkilîyê daîmî awan bibê û waştiş bibo ke medya Kurdî muhîmî bido
meseleya Ziwanê Kurdî. Xebata Platformî û Torî bi heme saziyanê medya Kurdî reyde ganî bi
dostane dewam biko. Semedo ke wa heqê ziwanê Kurdî bikewo rojdemê sîyasetî û cematî,
Medya Kurdî her tim ardim kena.

Heta Roja 15ê Gulane, yan zî Roja Zimanê Kurdî, Platform û Tor pîya û bi saziyanê eleqedar
reyde semîner, panel û konferansan virazê. Bi taybetî zî meseleya ziwanî ser o û cinî, ziwan û
netewe, ziwan perwerde, ziwan û hûquq, ziwan û siyaset û swbn… çalakîyan organîze bikê.
Ziwanê ma her tim do rojdem de bo. Gorê şert û mercan zî konseranê mûzikî bi hunermendan
reyde hadre bikê.

Ancî bi şarê xo reyde, ziwanê Kurdî ser o kombîyayîşan dadî û babîyan reyde, bi ciwanan reyde
qisey biko, muhîmîya ziwanê Kurdî vejo orte û mîyanê şarî de astengî çî yê, rayîr û metodan zî
bi beşdaran reyde niqaş biko…

21ê Sibate Amed

Platformê Ziwanê Kurdî û Tora Ziwanî û Kulturê Kurdî