Beyanatê PAK û PSK de wina vajîya:

“Awanbîyayîşê Dewleta Xosere Heqê Ma Ya

Referandûmê Xoserîye û Netîceyê Ey Meşru Yê

PAK û PSK Semedê Serrgêra Referandûmê Xoserîye Amed de roja 25.09.2020 de Cemîyetê Rojnamegeran yê Amedî de kombîyayîşê çapemenî viraşt.

Kombîyayîş bi semedê şehîdanê Kurdistanî rêzgirewtiş dest pêkerd.

Moderatorîya kombîyayîşî endamê Komîteya Rayberî ya Merkezî ya PAKî Hanifi Turan kerd.

Serekê Pêroyî yê PSKyî Mesûd Tekî beyanatê hemparî yê PAK û PSKyî wend.

Xeylê televîzyonê Kurdan û rayber û endamê PSK û PAKî pa sîyasetmedar û roşnvîranê Kurd beşdarê kombîyayîşî bîyî.

No zî tekste beyanatê hemparî yê PAK û PSKyî yo:

Awanbîyayîşê Dewleta Xosere Heqê Ma Ya

Referandûmê Xoserîye û Netîceyê Ey Meşru Yê

Basûrê Kurdistanî de Referandûmê Xoserîye ser ra 3 serrî vîyartî, la hîs û cosê ey hîna zî ganî yê û derheqê ey de minaqeşeyî dewam kenê.

Her çî ra ver gereke bêro vatene ke, netîceyê referandûmê demokratîkî nîşan û îradeyê şarî yo.

Coka dişmenê Kurdan û êyê ke referandûm qebûl nêkerdê se vanê wa vajê, referandûmê xoserîye ke Başurê Kurdistanî de virazîya meşru yo, heqê şarê Kurdî yo û sey şitê dadî helal o.

Şarê ma Kurdistanê Başûrî de bi beşdarîyêka pîle beşdarê referandûmî bîyo û bi raydayîşo pîl semedê awankerdişê dewleta xosere vato “erê”.

Şarê ma bi rayanê xo seba ke îradeyê xo nîşanê dinya bido vato ke, êdî nêeşkeno û nêwazeno binê hukmê Iraqî de biciwîyo.

Şarê Kurdî Başûrê Kurdistanê de bivengêko zelal û berz na eşkere kerd ke, dewleta xosere heqê ma ya.

Bê guman rîyê tay sebeban ra, sebebanê mîyanê xo ra û teberî ra îradeyê şarê ma yê Başûrê kurdistanî yo seba xoserî ame binpay kerdene û şarê ma ewro nêeşkeno netîceyê nê referandûmî bîyaro ca.

Labelê netîceyê referandumî tapûyê dewleta xosere yo, ma eşto cêbê xo û êdî peyser agêrayîş çin yo.

Ma hêvî kenî ke, hêzê welatperwerî yê Başûrê Kurdistanî do gorê şertan netîceyê referandumî bîyarê ca û dewleta xo ya xosere ronê.

No hewn û xeyalê heme Kurdan o. Hezaran tekoşêr û qehremanê Kurdî semedê ney canê xo dayê.

Ma sey PAK û PSK newe ra hetkarî danê referandûm û netîceyê ey û hêzanê welatperweran Başurê Kurdistanî ra wazenê wa semedê pawitişê qezencanê netewî, seba caardişê netîceyê referandûmî ke berhemê seyan hezar Enfalî yo, berhemê gonîya şehîdan o, destanê xo bidê yewbînan.

Ma bi wesîleya serrgêra referandumî ra newe ra semedê xebate û keda komîteya referandûmî ke bi serekîya Brêz Serek Mesûd Barzanî de şew û roj xebitîyay, ma pêrune ra spas kenê.

Netîceyê referandûmî roşnîya rayîrê awankerdişê dewleta xosere yo û çoş û hêz dano heme hêzanê welatperweranê Kurdistanî.

Ma venga heme dewletanê herême û heme hêzanê eskerî û siyasî danê ke, wa hurmet nîşanê hukmatê resmî, meşru yê Parlamento, Serekî û hukmatê Herêma Federe ya Başurê Kurdistanî bidê.”

Pîroz Bo Referandûmê 25 Êlûle!

25 Êlûle 2020

Partiya Sosyalîst a Kurdistanî-PSK

Partiya Azadîya Kurdistanî- PAK