125 serrî verî, roja 22ê Nîsane de hûmara Rojnameyê Kurdistanî ya yewine vejîya û bingehê medyaya Kurdî ame eştene.
Ewro 22ê Nîsane, vejyayîşê rojnameyê Kurdî yo bi nanameyê “Kurdistan” ser ra 125 serrî vîyartî. Na roje mîyanê cimetê Kurdan de sey Roja Rojnamegerîya Kurdî qebûl bîya û a roje ra nat yena pîrozkerdiş.
Rojnameyê Kurdistanî hetê Miqdad Midhet Bedirxanî ra 22ê Nîsana 1898î de paytextê Misrê Qahîre de dest bi weşanê xo kerd. Hetanî serra 1902î 4 rîpel û bi pêroyî de 31 hûmare vejîyayo.
Rojnameyê Kurdistanî pêro-pîya 31 hûmare vejîyayo. 5 hûmarê ewilinî hetê Miqdat Midhet Bedirxanî ra ameyê vetiş. La o wext zordarîya osmanîyan ver Miqdat Midhet Bedirxan nêeşkayo hûmaranê bînan vejo. Dima ra birayê ey Ebdurrehman Bedirxanî no wezîfe girewto xo ser û dest bi vetişê Rojnameyê Kurdistanî kerdu.
Ebdurrehman Bedirxanî zî zordarîya Osmanîyan ver şîyo Ewropa û Swîsre û Îngilîstan de dest bi vetişê Rojnameya Kurdistanî kerdo. Hûmarê rojnameyî yê 6-19 Cenevre de, hûmarê 20-23 London de, hûmarê 24-29 Folkeston û hûmarê 30-31 zî Cenevre de vejîyayê.
Kişta bîne ra Parlamentoyê Herêma Kurdistanî zî roja 22î Nîsane sey roja rojnamegeranê Kurd qebûl kerdo û Sendîkaya Rojnamegeranê Kurdistanî serra 1998î de ameya ronayene. Warê kar û gureyê rojnamegerîya Kurd de hetanî nika kovar û rojnameyê Kurdî zaf rey ameyê astengkerdiş. Hetanî nika xeylê rojnamegerê Kurd semedê gureyê xo yê rojnamegerîye yan erzîyay hepisxaneyan, yan şîyê surgun û yan zî amê kiştene.
Ma zî sey keyeyê Amida Haber Roja Rojnamegerîya Kurdkî pîroz kenê. (Amida Haber)