Zahîde Aydemîr ke dewa Rîzî ya Dara Hênî ya Çewlîgî de ciwîyena, bi serrano debara xo bi hingdarî kena û vana: "Keyeyê ma nêzdîyê 70 serrîyo ke pê nê karî keno. Ma sey mîrasî nê karî domnenê."
Kurdîstan de rindîya her serrwextî cîya ya. Bi taybetî Çewlîg pê rindîya xozaya xo zanîyeno. Dewa Rizî ya qezaya Dara Hênî ya Çewlîgî de dewijî pê hingdarî debara xo kenê, dewe pê hingemînê xo namdar a.
Dewije Zahîde Aydemîr zî debara xo hem bi ramitişî û hem zî bi hingdarî kena. Keyeyê ci nêzdîyê 70 serrîyo nê karî keno û sey mîrasî neqlê neslê neweyî keno. Nika zî Zahîde nê karî kena. Zahîde derheqê karê xo yê hingdarîye de qisey kerd.
Zahîde ard ziwan ke hingdarî sey karê camêrdan hesibîyena û vat: "Labelê cinîyî zî eşkenê nê karî bikerê. Ma debara xo bi hingdarî û ramitişî kenê. Zehmetîya wird karan zî esta. La karê hingdarî hîna zaf zehmet o. Dewa ma wayîrîya nebat û vilan ê cîya-cîyayan kena. O zî beno sebeb ke mêsê hingimênî bêrê tîya.
"Adare de wexto ke wisar erdî xemilneno, mêsî vilanê koy û zozanan ra polenan arê danê. O wext karê ma dest pêkeno. Bi no qayde nêzdîyê 3 mengî pê arêdayîşê nektaran derbaz beno. Peynîya aşmaa gulane de zî hînî mêsî hêdî hêdî xo seba arêdayîşê hingimênî hadre kenê. Hînî wextê viraştişê hingimênî yeno. Hingimên mabêne 20ê hezîran û 20ê temmuze de virazîyeno. Ma aşma 7. de hînî hingimên vejenê. Verê 3 şilxî bîyî la nika semedo ke peynîya hamnanî ya hînî 2-3 rojan de tena 2 şilxî vejenê. Ge-ge yew safha de mabêne 10-15 kîloyan hingimên vejîyeno. Berardişê her safha sey yewbînan nîyo. Ge-ge zêde zî kêm zî vejêno. Ma kîloyêkê ci mabêne 150-170 TL ra roşenê. Bi taybetî zî ma Amed de roşenê. Uca de muşterîyê ma estê. Reyan zî teberê bajarî ra zî sîparîşî yenê."