Berdevka Koşka Spî Sarah Sanders di konfranseke rojnamevanî de ragihand, danîna bacê bo ser berhemên Amerîkayê ji aliyê Tirkiyê ve pêngaveke nerast û şaş e û cihê dilgiraniyê ye.
Sarah Sanders got: "Ya me pêngaveke bo ewlekariya neteweyî ye, lê bacên wan bersiveke bo me ye. Em piştgîriyê nadinê."
Sanders herwiha tekez kir, heger keşe Andrew Brunson were azadkirin jî baca ser pola û aleminyûma Tirkiyê nayê rakirin.
Sanders wiha axifî: "Brunson bê azadkirin jî bac her dimîne. Ev pirs cuda ye, bi ewlekariya me ya neteweyî ve girêdayî ye. Lê heger Brunson were azadkirin em dikarin ligel rayedarên Tirk li ser rakirina cezayan guftûgo bikin."
Sara Sanders berî du rojan jî gotibû, Serok Trump pir cidî ye û dixwaze di zûtirîn dem de Bronson were serbest berdan. Heger neyê azadkirin jî Amerîka dê sizayên zêdetir li ser Tirkiyê bisepîne.
Duh dîsa azadkirina Keşeyê Amerîkî Andrew Brunson, ji aliyê dadgeha Îzmirê ve hatibû redkirin.