Semedê kesê ke hêrişa DAÎŞî yê Garê Anqarayî de ameyî qetilkerdiş, merasimo ke ame kerdiş de ame vatiş ke heta kiştoxî bêrê muhakemekerdiş, do têkoşîn dewam bikero.
10 teşrîna verêne 2015ine de 104 kesê ke hêrişê DAÎŞî yê hemverê, “Mîtîngê Aştî û Demokrasî” ê Meydanê Garî de ameyî qetilkerdiş, ameyî yadkerdiş. Yadkerdişê 7ine ê hetê Komeleya Aştî û Demokrasî ke 10ê teşrîna verêne de ame organîzekerdiş, Hemserekê Pêroyî yê Partîya Demokratîke ya Şaran (HDP) Mîthat Sancar, Serekê Pêroyî yê Partîya Kede (EMEP) Ercument Akdenîz, Parlamenterê Partîya Karkeran (TÎP) Ahmet Şik, Parlamenterê HDPyî û CHPyî, endamê Yewîye Tabîban ê Tirkî (TTB), Konfederasyonê Sendîkayê Kedkarê Îstîmlakî (KESK), Yewîya Odaya Muhendisan û Mîmaran ê Tirkî (TMMOB), Konfederasyonê Sendîkayê Kedkaran ê Şorişgiran (DÎSK) û keyeyê kesê ke qirkerdiş de dinyaya xo bedelnabî, bernameyê yadkerdişî de amade bî.
Vernîya yadkerdişî de polîsan meydan kerd binê ablûqa û tewrbîyayîşê şarî ke waştêne bikewê meydan û rojnamegerî ameyî astengkerdiş. Polîsî pêwa rojnamegeran şîdet girseyê ke waştêne bikewo meydan kerd û xeylêk kesê ke reaksîyon mojnayî zî destbend kerdî.
Rayîr ra şîyayîş ame organîzekerdiş
Keyeyê ke merdimê înan qetlîam de dinyaya xo bedelnayê, vernîya Garê Anqarayî de pankartê fotografê kesê ke ameyê qetilkerdiş ser de bî wedarnayî û rayîr ra şî. Keye û birîndarê qetlîamî, sloganê sey; “10ê teşrîna verêne meke xo vîr ra, mede xovîrrakerdiş", “De roje bêro, dewran agêro, kiştoxan ra hesab do bêro perskerdiş”, “Hemverê faşîzmî mil bi mil”, “Kiştoxê DAIŞ hemkar AKP” berz kerdî. Keyeyan, nameyê kesê ke dinyaya xo bedelnayê, yew bi yew wendî û girse cewabê, “Tîya yo/ya" da û yadkerdiş saete 10.04ine bi rêzgirewtiş dest pêkerd.
Yadkerdişê 7ine ê Qetlîamî de Sereka Komeleya Aştî û Demokrasî ya 10ê Teşrîna Verêne Mehtap Sakîncî qisey kerde û vat: “Ma her serre semedê vengê dejê ma bêro eşnawitiş, yadkerdiş kenê û heta kiştoxî bêrê muhakemekerdiş, ma do nê çî dewam bikerê. Heta edalet bi ca bêro, her 10ê aşme ma do tîya kom bibê. Polîsan xeylêk kesî yadkerdiş de destbend kerd. Ma nêwazenê bi tena sereyê xo şînê xo bigîrê.”
Dima ra zî Hemsereka KESKî Şukran Kablan Yeşîl, Sereka Pêroyî ya DÎSKî Arzû Çerkezoglû, Dayîka Korkmaz Tedîk ke qetlîam de dinyaya xo bedelnabi Zohre Tedîk, Serekê TMMOByî Emîn Sekreterê Pêroyî yê TTByî Vedat Bûlûtî qisey kerd.
Dimayê qiseykerdişan merasîmê vîrardişî bi ronayîşê qerenfîlan ê vernîya vîrardişê temsîlî peynî bi.