Merkezê Xeberan- Enver Bazir (77) o ke dewa Ûlpinarî ya Pêrtegî ya Dêrsimî de ciwîyeno, mamostatîye ra teqawut bîyo. Bazir wazeno ke hacetanê zîretî yê tarîxîyan û hacetanê dewe newe ra biviraze û bi nê hewayî roja ewroyêne rê sey eseran înan biverde. Bazir tayê hacetanê sey destarî, are, şaneyê pirçî, patose, gindore newe ra virazeno. Bazir nê hacetan pê gozêran, tûyêran û teyêran virazeno û viraştişê tayê hacetan ge ge 2-3 aşman ge ge zî heman roje de qedîneno.
Baziro ke exlebî menganê zimistanî de hacetanê xo virazeno, armanc keno ke ke wareyê Dêrsimî de mînyaturanê keyeyanê dewan ê texteyênan bivirazo. Bazir pêroyê hacetanê xo keyeyê xo yê dewe de muhefaza keno û seba ke yew muzeyê şaredarîye de bêrê mojnayene, do înan bêpereyan bexş biko.
Bazir verê cû qefesê zerencan zî viraştêne la dima seba ke naye goreyê fikiryayîşê ci nêbî ci rê fek vera dayo. Bazirî vat: "Qefesî verê azadîye gênê. Ez nêwazeno ke milçîkêk zî azad nêbo. Naye ra mi viraştişê qefesan ra fek vera da.Hacetê ke nika ez virazena hînî çin ê. Mi têna waşt ke vîrameyîşê domanîya xo bide ciwîyayene.
Hacetê ke ez virazena se ra 98 neqirnayîş ê. Armancê mi no yo ke bi taybetî vîramayeşê domanîya xo sey mîras biverde û roja ma ya ewroyêne rê înan bide naskerdene. Ez exlebî menganê zimistanî de hacetanê xo virazena, menganê hamnanî de bilîyê hêga û baxçeyan bena. Ez viraştişê înan ra kêf kena, şay bena. Ez emser zimistan do zaf bixebita, hacetanê neweyan bika.
Werrekna ciwanî bêrê dewa ma, ez zî înan rê bimusna ke hacetan senî virazena. Ez cuya şaristanî ra hes nêkena, nêwazena ke dewe ra ber cayêk de biciwîya. Nêbo mi waştêne ke cayanê merkezîyan de ders bide. La ez wina fikirîyena ke hacetanê ke ez virazena ganî yew eleqeyê viraştişê înan ê bi dewan bibe ke yew erj û meneya ci zî bibo. Ez ciwanan dawetê dewa ma kena. Ez wazena ke ciwanî nê karî bimusî û pêşkêşê amayoxî bikê."