Mele Mustafa Barzanîyo nêmerde, rayverêkê miletê Kurd û Kurdistanî yo tarîxî yo û ma ey bi hurmet yad kenîme.
Barzanî 14.03.1903î de ameyo dinya û roja 01.03.1979î şîyo heqîya xo. Adara emserî, serrgêra rojabîyayîşê ey a 118ine û serrgêra wefadê ey a 42in a.
Roja ke ameyo dinya ra hetanî wefadê xo, cuyayîşê Mele Mustafa Barzanîyê nêmerdeyî, hetêk ra hîkayeya têkoşînê neteweyî yê miletê Kurd û Kurdistanî ya seserra 20an a.
Cuyayîşê Mele Mustafa Barzanîyê nêmerdeyî, bi şer, hefs , koçberî, surgun , wêranî û bi trajedîyanê pîlan vîyarto. Hetêk ra zî cuyayîşê M. Mustafa Barzanîyê nêmerdeyî, bi weşî û nêweşîyanê xo, bi serkewtiş û şikyayîşanê xo, bi welatperwerî, bi xebate û bi têkoşînekêko pîl, bi hêvî, bi xoverrodayîş û bi vindertişo bi şexsiyet vîyarto.
Mele Mustafa Barzanî temamê cuyayîşê xo de çi rey fek mutewazîtî, sebir, tolerans û zerrîweşîya xo ra veranêdayo.
Mele Mustafa Barzanî raybazê Şêx Abdulselam Barzanî û Şêx Ahmed Barzanî xebitna û medreseya welatperwerîya înan de perwerde dîyo. Raybazê M. Mustafa Barzanî, dewamîya raybazê Teşkîlatê Azadî yê Xalid Begê Cibrî, yê Xoybûnî û yê Komara Kurdistanî yo. Ey dewaya Şêx Seîd, Xalid Begê Cibrî, Seyid Riza, îhsan Nurî , Qazî Mihemedî domna û aver berd.
O aktor û şahîdê xeylî qewimayîşanê tarîxîyan bi. Sey Serfermandarêkê Artêşa Komara Kurdistanî (Komara Mehabadî) ronayîşê Komara Kurdistanî de rolêko tarîxî kay kerdo. O ronayox û Serekê Partîya Demokrat a Kurdistan-Iraqî yo. Mele Mustafa Barzanî rijyayîşê Komara Kurdistanî ra dima, 11 serrî Yewitîya Sowyetî de pa 500 hevalanê xo yê pêşmerge cuyêko zaf zehmetin vîyarnayo.
Mele Mustafa Barzanî, serra 1958î de agêrayo Iraq la badê cu mecbûr mend ke serra 1961î de şorisê êlûle bido dest pêkerdene. 11ê adara 1970î de hukmatê Iraqî dir peymanê otonomî îmze kerd. Rejîma Beesî şertê peymanî nêard ca.
Mele Mustafa Barzanî reyna serra 1974î de dest bi şero çekdarî kerd. La serra1975î de Amerîka Îran û Iraq bi peymanê Cezaîrî haşt kerd, badê cû Amerîka û Îranî Mele Mustafa Barzanî rê hetkarîya xo birna. Bi no qayde Mele Mustafa Barzanî sernêkewt. Mele Mustafa Barzanî mecbur mend ke şêro Îran. Û roja 01.03.1979 î de nêweşî xo ver wefad kerd.
Ala Kurdistanî ya ke Pêşewa Qazî Mihemedî teslîmê Mele Mustafa Barzanîyê nêmerdeyî kerd çi rey nêkewt waro. Û a alaya ke Mele Mustafa Barzanîyê nêmerdeyî teslîmê pêşmergeyanê Kurdistanî kerdbî, bi têkoşînê pêşmergeyanê qehreman, bi têkoşînê heme kedakaranê dewaya azadî yê Başûrê Kurdistanî ewro Parlamentoyê Kurdistanî de Hewlêr de şîyena têra.
Xebate, têkoşîn, vindertiş û şexsîyetê Mele Mustafa Barzanîyê nêmerdeyî ewro zî semedê heme Kurdanê dinya cayê hurmetî û hêvî yo. Mele Mustafa Barzanî, pêşmergeyêk bi, serfermandarêk bi. Rayverêk û serekêk bi. Warê mîyanneteweyî de cayê ey zaf muhîm bi.
Mele Mustafa Barzanîyo nêmerde serekê partiya xo, yê miletê xo, yê welatê xo bi. Xebate û têkoşînê ey xebate û têkoşînê ma yê.
Mele Mustafa Barzanîyo nêmerde her çar perçeyanê Kurdistanî de zî, zerrîya her Kurdî û Kurdistanijêk de nameyê dilsozî, bawerî, welatperwerî, sebir, xebate û hurmetî yo.
Azadî û xoserîya Kurdistanî do xelata tewr pîle bo semedê Barzanîyê nêmerdeyî.
Ma serrgêra wefadê ey a 42ine de, Mele Mustafa Barzanîyê nêmerdeyî bi hurmet yad kenîme.
01.03.2021
Buroya Çapemenî û Têkilîye PAKî