Kubra Ekîn ke verê zî semedo ke şîdet ci rê amebi kerdiş gerre kerdibi, 11 rojî yo zanayîş ci ra nîno girewtiş. Dayîka Kubra, Rahîme Ozdemîr dîyar kerd ke semedê rewşa kênaya xo xeylêk endîşeyîn a û tersena ke çîyêk ameyo sereyê aye. Rahîme, veng da ke wa kênaya bêro vînayîş.
Kubra Ekîn ke 5 mengî verê semedê cil û belgê xo hêrişî dir rî bi rî menda, derheqê hêrişkarî de gerre kerda. Labelê camêrdo ke hêrişê ci kerdibi, serbest amebi veradayîş. Ame eşkerakerdiş ke Kubra 13ê Teşrîna Peyêne dayîka xo ra vata, ez şina sûke û reyke bîn xebere ci ra nêameya girewtiş. Dayîka Kubra Rahîme Ozdemîr ajansê ma rê qisey kerd û veng da ke kênaya bêro vînayîş.
'Telefonê aye ameyo padayîş û tu rêçe pey de çin a'
Rahîme dîyar kerd ke Kubra tu wext telefonê xo panêdana û aye endîşe kena çîyêk ameyo sereyê kênaya aye û vat: "Semedê serebûtê ke 5 mengî verê bi ca amebi, ma keyeyê xo qezaya Rezanî ra bar kerd. Semedo ke Kubra dimayê nê serebûtî seba asayîşê xo bi endîşe bi, xeylêk tersayîne. Ma zî bi endîşe yê û ma waşt ke uca ra şêrê. Labelê nika zî kênaya mi vînî ya û ez nêzana çi ameyo sereyê aye. Roja 13ê teşrîna peyêne de Kubra şî teber semedê çîyan bigîro. La dimayê a roje ma xebere ci ra nêgirewte. Telefonê ci ameyo padayîş û tu şop rêçe pey de çin a. Kubra tu wext telefonê xo panêdayîne. Her tim xebere dayîne ma. Ma bi embazanê ci dir qisey kerd la ê zî çîyêk nêzanê û şaş mendê. Ez bi endîşeyîn a ke çîyêk ameyo sereyê aye."
'Embazê aye bi nakokî qisey kerd'
Rahîme vat tewr peyîn Kubra bi embazê xo dir ameya vînayîş û vat: "Waştîyê Kubra bi. Kênaya mi dimayê çend aşmî vat, 'Ma do demêk nêzdî de bizewicyê' Kubra hemverê fikrê zewacî bî. Semedo ke wexto vat ez wazena bizewiciyî, ma şaş mendî. Kubra gama ke şîbî semedê çîyan bigîro, embazê xo dir şîbî. Coka ma sere de ey gêrayî ke Kubra ra xebere bigîrê. Labelê destpêk de vat, 'Kubra verê mi de nîya' dima ra zî vat, 'Kubra verê mi de nêbî.' Yanî qiseykerdişê nakokî kerd.”
'Wazena kênaya mi bêro vînayîş'
Rahîme vat muracatê qerekole zî kerdê la înan rê cewab nêameyo dayîş û wina vat: "Ma xeylêk rey şî qerekole. Labelê dimayê ke îfadeyê ma ame girewtiş tu çîyêk nêame kerdiş. Ez semedê xemê kênaya xo neeşkena rakoyî, ne zî eşkena werd biwerî. Kênaya mi çi rewşe de ya nêzana. Beno çîyêk xirab zî ameyo sereyê aye. Ez tersena derheqê kênaya xo de xeberêke xirab bieşnawî. Ez wazena kênaya mi bêro vînayîş."
Çime / Jinnews