MA HÊVÎDAR Ê,
MA DO PÎYA SER BIKEWÎN.
NE XENDEQÎ NE QEYUMÎ,
BAJARANÊ XO ZÎ WELATÊ XO ZÎ MA BI XO DO
ÎDARE BIKÎN
MA HÊVÎDAR Ê,
MA DO PÎYA SER BIKEWÎN.
NE XENDEQÎ NE QEYUMÎ,
BAJARANÊ XO ZÎ WELATÊ XO ZÎ MA BI XO DO ÎDARE BIKÎN
Kurdistanijê Erjayeyî
Ma sey namzetanê Îtîfaqo Welatperwer û Demokratî weçînayîşê 31ê adare 2019î rê namzetê.
Ma wazenê ke do paştgirîya ke şima ra bigîrê û şima reyde welat û bajaranê xo îdare bikîn.
Şima na rey bêçare nîyê.
Ma biryardar ê, ma do pîya çemberê “yan kiştiş yan tekdîr”î bişîknîn.
Bajarê ma yê ke durrê (încîyê) dinya yê û bi hezaran serrî verî ra ma rê mîras mende, çîyanê hîna başan heq kenê.
Ma soz dayo, ma do înan sey bîbika çime xo bipawê.
Ma do bajaranê xo kamîya înana neteweyî û tarîxî gore organîze bikê.
Ma sey Îtîfaqo Welatperwer û Demokratîwayîrê programêkê zelal ê.
Ma biryardar ê ke şerê qilerin û kayê şîdetî yo ke gonî û îstire ser ra domnîyeno bixeripnê.
Ma naye vanê: Paradîgmaya “tek dewlete, tek milet, tek welat û tek ala” ya 95. serreyine û sîyasetê qeyumî û elehtarîya kurdan yê Dewleta Tirkîya rayîrêko kor o.
Ma îdîa kenê ke feraseto ke bi ey paştgirî dîyeno sîyasetê xendeq û barîqatan û “welato hempar, komara demokratîke, netewo demokratîk” vajîyeno çareserkerdişî xitimneno.
Ma vanê ne xendeqî ne qeyumî; ma wazenê bi alternatîfêkê demokratî şarê xo rê rayîrêkê neweyî akerîn.
Vîzyonê Ma Zelal o
Ma do ferasetêkê şaredarîkarî yê zafziwanî tesîs bikîn.
Kurdîstan de xizmetanê îdareyanê mehelîyan de do kurdkî bero esas girewtene.
Seba ke kurdkî bera musayîş (banderbîyayîş) û vila biba do her taxe de kreşê kurdkî û keyeyê ciewnîyayîşî yê rojaneyî abibê.
Ma do bajaranê xo bîyarîn şeklêkê hîna plankerde û bikonfor bikê.
Ma do şaredarîkarîyêka şefaf û bieşkîyo hesabê îcraetanê xo bido awan bikê.
Pawitişê dorûverî û cuya tebîîye do çimê ma de çîyanê vernîyan ra bibo.
Ma do seba astengdaran bajaranê hîna rehetan û ê bieşkê tede bikonfor biciwîyê awan bikîn.
Ma do vera heme elementan yê ke ciwananê ma kenê krîmînalîze mücadele bikîn.
Ciwanê ma ameyoxê ma yê, ma do seba ke ê daxilê cuya sosyale bibê bixebitîyê.
Îdareyanê ma de îdareyê mehelîyî do sey parlamentoyanê herêmîyan bixebitîyê.
Ma do bajaranê xo beşdarbîyayîşê şarê xo bi hawayo rasterast û şarê xo reyde îdare bikîn.
Ma do demokrasîyê rasterastî saz bikîn.
Babetê muhîmî ke tesîrê înan cuya komelî ser o zaf ê, derheqê înan de do referandumî bêrîn kerdene. Sayeyê ney de merdime ma do îdarêkerdişê bajaran de wayîrê soz û biryarî bibê.
Ma do çîyanê hîna zêdêyan wazenê.
Meylê ma no yo ke wa Walî, Qeymeqam û Mudirê Asayîşî netîceya weçînayîşî de bêrîn wezîfe ser.
Ma israr kenê ke pêro xizmetê ke teberê selahîyetê hukmatê merkezî de manenê, wa dewrê îdareyanê mehelîyan bibê.
Ma do seba azadî, demokrasî û cuyêka merdimane mucadeleye xo bidomnîn.
Caardişê talebanê heqdaran yê kedkaran,
Teda, şîdet û netêduştîyê ke cinîyan ser o tetbîq benê, vernîya înan girewtene do hedefê ma yê tewr muhîmî bibê.
Ma do vernîye bidîn komresîye û aye geş bikîn. Binawanîya ke semedê naye îcab kena ma do bikîn ke aye game bi game teşkil bikîn.
Ma do çopan û eşteyan bi goreyê qaydeyanê hîjyenî arêdîn û transforme bikîn.
Sey Îtîfaqo Welatperwer û Demokratîyewna prensîbê ma esto; problemanê mewcudan bi metodanê aştîwazane çareser kerdene. Seba ke şîdet û şer bi heme netîceyanê xo cuya komelî ra wedarîyê ma do helwêsta xo ya biryardarî bidomnîn.
Şarê Ma yo Birûmet û Mucadelekar;
Kes nêeşkeno problemanê îdareyanê mehelîyan yê Kurdîstan û Tirkîya, problemanê umûmîyanê Tirkîya ra cîya bigîro. Vernîya problemanê bingeyinan yê Tirkîya de zî meseleyê Kurd û Kurdîstanî û meseleyê demokrasi yênê. Hetanî ke nê di meseleyanê rê çareyo temelli, daîmî û munasîbê standardanê unîversal nêro dîyayene, meseleyê îdareyanê mehelî zî tede çareserkerdişê problemanê binan zî mumkin nîyo.
Ma nêeşkenê çareserkerdişê nê meseleyan, ê kesanê ke bîyê sedemê înan ra bipawê.
Sey Îtîfaqo Welatperwer û Demokratîna babete de zelal, prensîbin û wayîrê helwêstêka bîryardar ê.
Meseleyê Kurd û Kurdîstanî
Meseleyê Kurdî meseleyêka alalade nîya. Meseleyê erdanê xo ser o û bi hawayo azadîyane ciwîyayîşî yê 25 mîlyon kurdan o ke Tirkîya û Kurdîstan de ciwîyenê. Tarîxê meseleyê kurdî reseno di seserrî verî û eynî wext de yew meseleyo hêremî û mîyanneteweyî yo ke Tirkîya, Îran, Îraq û Sûrîye eleqedar keno.
Welatê ma Kurdîstan o ke şarê ma bi hezaran serrî yo ke ser o ciwîyeno zî ameyo parçekerdiş û statuyê kolonîyêka mîyanneteweyî dîyayo ci.
Esasen meseleyê kurdî, netîceya xesbîyayîşê heqanê milî û demokratîkan yê şarê kurdî de vejîyeno meydan. Di sey serrî ra nata her teşebusê kurdan o ke xo rê azadîye hedef girewto bi hawayo leşkerî ameyo mexlubkerdiş. Seba ke ziwan û kulturê kurdan çin bihesibîyo çerxêkê zulm û asîmîsyonî yo xidar ameyo sazkerdene. Nufusê kurdan ser o polîtîkaya koç û îsqankerdişî bi zorî tetbîq bîyo û bî no hawa averşîyayîşê ekonomîk, sosyal û kulturkî yê kurdan ameyo astengkerdîş. Peynîye de Kurdîstan seke açarnîyayo cayêko şewatî.
Rewşa pêrodayîşî yo ke bî serran o ke Tirkîya de dewam keno, terefgîrîya ke vera-vera zêdîyêna û strukturê demokrasî yo problemin. Nê pêro netîceyê bî hawayo adil û têduştîyane çaresernêkerdişê meseleyê kurd û Kurdîstanî yo.
Ma sey Îtîfaqo Welatperwer û Demokratîçareserkerdîşê nê meseleyî ser o wîna fikîrîyenê: Na babete de gama verêne nêteqnîyayîşê çekan a, ê bînî zî cuya komelî de canêdîyayîşê şîdetî û seba ke meseleyê kurdî bî hawayo aştîyane bero çareserkerdîş tesîskerdena atmosferêkê dîyalogî yê munasîbî. Goreyê ma ra no mumkin o.
Goreyê ma ra seba çareserkerdişê temellî û daîmîyî, ferasetê tekaneperest o ke kurdan seke çin ê hesibneno û sîstemê tekaneperest o ke beno sedemê nê ferasetî ra fek bero veradayîş. Sîstemo federal zî tede sîstemêko sîyasî esas bero girewtene.
Heme cografyayanê ke tede hetê ziwan û bawerîye ra yewî ra zêdeyêr şarî û grûbê etnîkî ciwîyenê, strukturê înanê sosyalî kozmopolît ê de çare bi tetbîqbîyayîşê prensîbê heqê tayînkerdena çarenuştişî yê miletan mumkin beno.
Ma no semed ra meseleyê Kurd û Kurdîstanî ma fikrê federasyonî yo ke rastîya di welatan û di miletan esas gêno û bi goreyê hemparîye organîze bîyo esas gênê. Ganî parlamento û hukmatê xo yê Kurdîstanê Federatîfî estbê. Kurdkî Kurdistan de biba ziwanê perwerdeyî û waranê umûmîyan de bibo wayîrê ziwano fermî.
Mumkin o ke yew dewlete de bi goreyê strukturê kultur û zaftewirîya etnîkî ya aye, yew ra vêşêr ziwanê fermî estbê. Dinya de Swêd, Swîs, Belçîka, Kanada, Federasyonê Rûsya, Hindîstan, Komara Afrîqaya Başûrî, Malezya, Îraq zî tede bi desan dewletê winasîyî estê.
Îraq de kurdkî serra 1958î ra nata ziwano fermî yo dîyin o. Îraq Qanûnê Bingeyinî yê 2005î strukturo federatîf qebul kerd. Kurdîstanê Başûrî, bi nameyê “Îdareyê Herêm Kurdistanî” îdareyê xo yê federalî awan kerd.
Heqê perwerdeyî yê bi ziwanê dayîke seba azadîya ziwan û kulturê înan, sey şarê armenî, asûrî-suryanî, ereb, mehelmî, azerî û turkmenîheme şaranê Kurdîstanî rê îcab keno.
Seba ke biresîyo nê amancan, ma heme merdimanê ke meseleyê kurdî rê çaresererîyêka adil û aştîyane wazenê ra, heme merdimanê ke aştî û azadî wazenê ra seba namzetanê Welatperwer, Demokratîk û Xoseran rê ray wazenê.
Tirkîya de seba Demokrasîyêkê Kamilî
Ma bawer kenê ke; eke Tirkîya de demokrasîyêko bi goreyê standardanê cîhanî bero tesîskerdiş, no do semedê xebata azadîya neteweyî ya kurdî imkanêko baş peyda biko. Azadbîyayîşê netewa kurdî zî demokratîzebîyayîşê Tirkîya asan keno.
Aye ra mücadeleye neteweyî de ma hêzanê demokrasî û vurîyayîşwaştoxan yê Tirkîya
sey dostî vînenê, ma esasê qebulkerdişê heq û azadîya neteweyî û demokratik yê kurdan qiymetêkê pîlî danê xebata hempare.
Ma wazenê;
Tirkîya de sîstemo tekçî, nijadperest û otorîter wedarîyo,
Demokrasîyêko bi goreyê standardanê cîhanî bero awankerdiş,
Wesayeto mîlîtarîst wedarîyo,
Pêro grûbê etnîkî û grûbê bawerî wa biresê heq û azadîyanê xo yê bingeyinan,
Herinda sîstemê merkezîyetçî yê sertî de îdareyêko adem-î merkezîyetçî awan bibo,
Yew qanûnê bingeyin yo ke bi goreyê strukturê zafziwanî, zafkulturî û zafdînîye bero amade kerdene,
Estena miletê kurdî bero qebulkerdiş, seba Kurdîstanî statuyo federatîf qebul bibo,
Ganî heme engelê ke vernîya azadîya fikrî, rêxistinî û azadîya çapemenîye gênê bêrê wedarnayîş,
Ganî Peymana Venedîkî heme partîyê sîyasî û komeleyê antîşîdetî serbest bibê.
Qanûnê Partîyanê Sîyasîyan, qanûnê weçînayîşî, qanûnê ceza, bêrê demokratîzekerdiş; Qanûnê Mucadeleyê Vera Terorî bero wedarnayene.
Ganî şertê barajê %10î û şertê seba beşdarîya weçînayîşanya ke 41 bajaran de rêxistinebîyayîşî vacîb kena bêrê wedarnayîş. Ganî parlamento de her partî qasê rayanê xo yê ke girewtê wayîrê temsîlkaran biba û eynî hewa budçeya xezîne ya dewlete ra aedim bigîra.
“Sondê Parlementerîye” yo ke rûmetê miletê kurdî û heme grûbanê etnîkîyan û sewbîna derûdoranê sîyasîyan rencîde keno, newe ra û bi goreyo ke estena heme grûban yê etnik, sîyasî, dînî, mezhebî û sîyasîyan esas bigirîyo bero nuştene.
Ma piştgirî dane çareserîyêka azadîya fikir, bawerî û wicdanî ya meseleyê elewîyan. Ganî cemxaneyî wayîrê statuyê resmî bibin. Ancîna ma wazenê ke meseleyê bawerîyî yê yên xirîstîyan, musewî û êzîdîyan bêrê çareserkerdiş.
Îdareyê Mehelî yê Bêwesayet û Beşdarîwazî
Fikrê ma, çareserkerdişê problemanê plananê mehelîyan de rolo esasî yê îdareyê mehelî yo. Meclîsê mehelî ganî sey yew parlamentoyo mehelî bixebitî. Xizmeyê sey perwerdeyî, weşîye, ewlehîya mehelî ganî hetê îdareyanê mehelîyan ra bêrê kerdiş. Ganî îdareyanê mehelîyan ser o wesayetê merkezî bêro wedartiş.
Ma do seba betalkerdişê ê îhtîrazan bixebite ke Tirkîya verba ‘Şertê Otonomîye yê Îdareyanê Mehelîyan yê Ewropa’ ronayî û bi no hewa heqê ke bi na peymane dîyayê sînor kenê.
Seba ke perwerdeyê ziwanê dayîke de hetkar bê ma do gelek wendegeh û kreşan abikere.
Ma do bi heme wasitayanê komunîkasyonan, sey wasitayê înternetî, qeraranê sermayegozarî, îhale û mesrefê şaredarîyan pêşkêşê hemwelatîyan bikere. Îdareyê ma de, heme faaîletê ma do zelal, şefaf û eşkera bê. Bi no hewa do her kes bieşko bireso nê malumatan.
Mal û milkê serekê şaredarî û yê îdarekaran, roja ke ameyê weçînayîş û dest bi xebate kerda ra hetanê roja peyin a xebata xo, do her serre pêşkêşê rayapêroyî bibo.
Sîyasetê ma yê bajarvanîye do modern, biplan, pak û însan-merkezî bo.
Bajarê ma yê ewroyênî bîyê sey qûça betonan ke nêverdenê merdimî nefes bîgêrê û ameyîş-şeyîşî kenê sey îşkence. Ma do firsend nêde ke bi hewesê rantî û xirsê lezradewlemendbîyayîşê çend kesan mîmarîya bajarî serobino kenî û bajaranê ma kenê sey qûça betonan. No tehrîbato ke no war de hetanê ewro bîyo, ma do seba rastkerdişê ney zî xebatêka bisîstem, biplan bikere.
Mewzûyanê vûrîyayîşê şaristankî û bedilîyayîşê îmarî de qerar, plan û programî bê ke hetê şaredarîyan ra tesdîq bibê, ganî bi hewayêko yew-hetî tetbîq nêbê.
Ma do cayanê keskan bipawe û hîna bizêdne. Ma do bi parke û bexçeyan, bi rayîranê seyranan, seba gedeyan warê kaykerdişî, seba ciwan û pîlan sehaya sporî, seba astengdaran warê bêastengî û seba kokiman warê cuya sosyalî biviraze. Bi no hewa şaristananê ma do ciwîyayîş hîna weş û rind bo.
Ma do merkezanê bajaran de otoparkanê newîyan û binawanîyêka biplane biviraze.
Ma do kiriştoxîya otobus û mînîbusan miheqeq hîna sîstematîk û bikonfor bikere. Heto bîn ra, ma wazenî komresîye de çeşîdîye bizêdîne û hîna bilez û bikonfor bikere. Seba ney zî ma do butçeyêka taybetîye amade bikere.
Cade û kuçeyî neynikê bajaran ê. Çi heyf o ke ewro, sere de bajarê pîlî heme bajaran de cade û kuçeyî bîyê sey îşkenceyî. Seba trafîkêkê rehetî, hewcedarîya binawanîyêka biplane esto. Seba çareserkerdişê na probleme, goreyê îhtîyacîye, ganî bajaran de torê resî yê binerdî yanî metro bivirazîyo, û serê erdî de zî bi otobus û sîstema raykî ameyîş-şeyîş bêro asankerdiş. Ma talîbê ney ê.
Resê mîyanê bajaran û zereyê bajarî de ma do seba zêdînayîşê barê sîstema raykî, xebata ke lazim a, bikere.
Ma mintiqaya binlerzî de ciwîyenî. Ma do goreyê ney têbigêre û dîqet bikere ke awanî û bînayî goreyê talîmatnameyê binlerzî bê û pêt bê.
Ma do bajar û beldeyan de seba asankerdiş û averberdişê faalîyetanê sosyal û kulturî, goreyê îhtîyacîye keyeyanê hemwelatîyan û merkezanê kulturî abikere. Partîyê sîyayî, komele û sazîyê kulturî eke îhtîyacîya înan biba eşkenê nê cayan de bê ke pereyêk bidî, faalîyetanê xo bikerî. Goreyê ma faaîletê cuya sosyale yew heq o û ganî her kes bieşko nê heqî ra îstîfade bikero.
Ziwan, bawerî û kulturî ke plana mehelî de estê, seba pawitiş û bi hewayêko azadane averkewtişê înan ma do sey îdareyanê mehelîyan hîna zaf piştgirî bide.
Ma do meclîsanê mehelîyan teşwîq bikere ke, seba gede û ciwananê bêkes û muhtacan xebatanê sey pawitiş, perwerdekerdiş û wayîrê kar û meslegî kerdiş bikerî û keyeyanê gede û ciwanan bivirazê.
Şaredarîyê ke ma do îdare bikere de, ma do girewtişê personelan de lehê cinîyan de kota rone.
Ma do roşnîkerdişê bajaran seba vernîgirewtişê tacîzan newe ra rast bikere.
Ma do zemîn û qatê yewinî yê parka otobusan seba astengdaran û cînîyan tehsîs bikere.
Ma do bixebite ke dezgehê hetkarîye, peydakerdişê sitare, îhtîyacîyê weşîye û hetkarîya werdî û sewbîna îhtîyacîyanê winayênan de dest bidê kesanê muhtacan.
Tebîet û dorûver do bêro pawitiş û polîtîkaya bajarvanî û endustrî de ganî weşîya neslê ameyoxî esas bêro girewtiş.
Dinyaya ma keyeyê heme merdimîye yo. Her qayde faalîyetî ke hemsencîya ekolojîke xerebnenê ganî bêrê vindartiş. Ma do bixebite ke faalîyetê endustrî, bajarvanî û enerjî tebîet de ahengdar bê. Seba pawitişê bajar, welat û dinyaya ma ke emanetê neslê ameyoxî yê, ma do seranserê dinya de hemkarîye bikere.
Averkewtişê bajar û endustrîye de bêplanî, bêperwa gurenayîşê çimeyanê tebîetî, tebîet xeribnayo û bîyo semedê qilêrîya hewa, awe û erdî. Ma do seba vernîgirewtişê na rewşe bixebite.
Seba yew cuye germî, roşnî, werd, cilûbergî, sitare, warê keskî ke weşîye û şayîya ciwîyayîşî zêdînenî lazim ê. Ma do nînan bi metodanê ke tewt tay tehrîbat virazenê û neweragurîyenê, pêşkêşê xizmetê şarê ma bikere.
Bajaranê ma de mintiqayê endustrî, ganî ey cayê ke binawanîya înan qedîyaya û warê ciwîyayîşî ra dûrî yê de bivirazîyê.
Seba abirnayîş û neweragurenayîşê eşteyan -ke peyina vîyarnayîşî de vejîyenê meydan- tesîsî do bivirazîyê. Û ma do hemwelatîyanê xo teşwîq bikere ke seba neweragurenayîşî karê abirnayîşî keyeyanê xo de bidî destpêkerdiş.
Ma do mîyanê dewan û bajaran de hemkarîye biviraze. Îhtîyacîyê bajaran do dewan ra temîn bibê û ma do sey şaredarî, seba pawitiş û rotişê nê mehsulan tedbîranê taybetîyan bîgere.
Seba pawitişê bajar û beldeyanê modernan û seba pawitişê dew û yabanî ma do sey çimê xo biewne tebîetî ra. Û ma do seba vernîgirewtişê tehrîbatê tebîetî bixebite.
Pawitişê tebîetî pawitişê ameyoxê ma yo. Eke ma tebîetî bipawe ma gedeyanê xo rê dinyayêka rinde verdenê.
Coka ma do ver-dibistanî ra sîstemê perwerdeyî de ca bide ê programan ke girîngîya pawitişê tebîetî anê ziwan.
Şarê ma yo Hêca
Şaro Kurd, Ermenî, Asurî-Suryanî, Ereb, Mihelemî, Azerî û Turkmenî û dîn û grûbê bawerî yê sey Elewî-Sunî, Xirîstîyan, Musewî, Êzîdî ke Kurdistan de ciwîyenê, netîceya polîtîya taldeker a dewlete de, demo vîyarte de gelek zehmetî antê. Coka, ganî dewlete nê heme polîtîkayanê xo yê vizêrinan qebul bikero. Û seba awankerdişê cuyêka seypê, azad û demokratîke ganî sîstemo ewroyên binî ra bêro vurnayîş.
Seba ke Tirkîya de standartanê unîversalî de yew demokrasî cayê xo bîgêro, vurîyayîşê sîstemî lazim o.
Labelê, Tirkîya derbazê sîstemêk ke tira vanê Sîstemê Hukumatî yê Serek-komarîye bîye. No sîstem, standartanê unîversalî de sîstemanê îdarekarîya demokrasî de pênêkeweno û dinya de sey xo nimûneyê xo zî çin o; hêzê qanûnviraştişî, rayberdişî û hukmdayîşî dano yew kesî û bi no hewa sîstemêko otorîter û keyfî vejîyeno meydan.
Tam zî no proses de weçînayîşê îdareyê mehelî yenê kerdiş.
Ma, sey namzetê xoserî yê Welatperwer û Demokratî, wina bawer kenê ke standartanê unîversalî de sîstemêkê îdareyî yo demokratîk lazim o û ma seba ney mucadele kenî. Nê sîsteman ra yew zî sîstemo federal o. Ma seba sîstemêko winasî, seba îdareyanê şaredarîyanê bêwesayet û demokratîkan reya şima wazenî.
Şarê Kurdistanî yo Hêca,
Seba persa Kurd û Kurdistanî çareserîya aştîyane û seypêparêze;
Seba demokrasîyo hemdem, zafaneparêz û beşdarîparêz;
Seba ziwanê dayîke de perwerdeyo bêpere û pêroyî;
Seba çareserîya heme persanê bawerîyan yê sey dîn û grûbanê bawerîyan ê Alewî-Sunî, Xirîstîyan, Musewî, Êzîdîyan û seba laîkîya rastikêne;
Seba heqanê cinî û karkeran, seba zafêr heqanê sosyalan;
Seba ameyoxo azad yê gede û ciwananê ma;
Seba îdareyêko mehelî yo demokratîk û beşdarîparêz û şarî rê akerde ke îdare qayûman ra keweno destê şarî;
Seba şaredarîvanîya zaf-ziwanî;
Seba ke ma bieşke xizmetî bi hewayêko adîl û seba taxanê feqîran bi cîyakarîya pozîtîfe, biresne heme nuqtayanê bajarî;
Seba astengdaran bajarê bêastengî;
Seba bajaranê ke kokimê ma hîna zaf beşdarê cuya sosyale benê;
Seba wayîrvejîyayîşê mîrasê ma yê tarîxî;
Seba bajaranê modern, pak û rindan;
Seba ke wa heme şarê ma mehelî de bibo îktîdar;
Seba ke ma vengê xo mehelî ra biresne dinya;
Seba ke bajaranê ma ma îdare bikere;
Ma pêro pîya piştgirîye bide namzetanê Welatperwer û Demokratîk yê xoseran.
Eke Îttîfaqo Welatperwer û Demokratîk qezenc bikero, ma di zaferan qezenc kenî.
Hem Kurd û Kurdistanî îdareyê mehelî qezenc kenê hem zî şaredarî bi zîhnîyetêko newe yê.
ÎTTÎFAQO WELATPERWER Û DEMOKRAT