Merkezê Xeberan
Şarê Dêrsimî yo ke wareyan de debarê xo pê heywankarîye keno, verê agêrayîşî amadeyîyanê xo yê pêyînan seba keyeyanê xo keno. Şarê wareyî vano ke cuya wareyî hem zehmet a hem zî rind a. Dewijî her serre destpêkê germbîyayîşî yê hewayî de qezaya Xozatî ya Dêrsimî ra şinê wareyê Koybaşi.
Wareyê Koybaşî yo ke binê Tirbeya Sari Saltûkî yo, seba Elewîyan cayêko bimbarek o tede 4 keyeyî ciwîyenê.
Gulten Balika ke 15 serran ra nata yena ware, her roje rew ra wurzena û dest bi karê xo kena. Balike va: “Karê ma zaf o, pê kerdiş nêqedîyeno. Ne dewe de ne zî ware de karî nêqedîyenê. Badê ke dewa ma amey qedexekerdene ma nêameyî ware. Dewa ma serra 1994 de amey vêşnayene, a serre ra nata ma 2-3 serrî Xozat de mendî, dima tim ma wareyan de yê. Emser ma zî tîya yê. Tîya cayê Hemet Qedî yo, cayê ocaxê Sari Saltukan. Cayê ma wareyê ma ameyî qedexekerdene. Heq nê merdiman ra razî bo ke destûr da ma ameyî tîya.”
Ma tîya de cem kenê, la roja Xidirî ma Xozat de kene
Balike vana ke heta ke destanê înan ra yeno bawerî û tradîsyonanê Elewîtîye anê ca û qiseykerdişê xo rê wina dewam kena: “Wexto ke roja 12 îmaman yena, ma rojeyê 12 Îmaman gênê, roşanê xo kenê, loqmeyê germîya îmaman pewjenê, qurbanê xo sere birnenê. Ma bala xo danê ke roje de çi yeno werdene çi nêno. Ma tîya de cem kenê la roja Xidirî ma Xozat de kenê.”