Tora Mafê Mirov a Kurdistanê (Kurdistan Human Rights Network) ya ku li paytexta Fransayê Parîsê xebatên binpêkirina mafên mirov ên li rojhilatê Kurdistanê û Îranê dimeşîne, ragihand ku Esad Ferheng, Sattar Xosrewî, Kamran Seqayî, Ehmed Narewî û Mihemed Îshaqzahî yên ku bi “narkotîk” û “kuştina bi qestî” hatibûn sûcdarkirin li girtîgeha navendî yên Ûrmiyê û ya Qezalhasar a li Kerecê hatine îdamkirin.
Li gor rapora Tora Mafê Mirov a Kurdistanê, girtiyê kurd ê ji bajarê Seqizê, Esed Ferheng, roja çarşemiyê 9ê Cotmeha 2024an, bo hucreya takekesî ya girtîgeha navendî ya Ûrmiyê hatiye veguhestin û sibeha roja 10ê Cotmeha 2024an, hatiye îdamkirin.
Tora Mafê Mirovan a Kurdistanê îro raportek belav kiriye ku derbarê 2 girtiyan de ye ku di girtîgeha Ûrmiyê de hatine îdamkirin.
Heman raporê dibêje, Esed Ferheng ku bavê 3 zarokan e û ji bajarê Seqizê yê parêzgeha Kurdistanê ye, berî niha bi 9 salan bi tawana “kuştina bi qestî” hatibû girtin û cezayê îdamkirinê lê hatibû birin, roja 10ê Cotmeha 2024an, hatiye îdamkirin.
Di dewama raporê de tê gotin, 9ê Cotmeha 2024an 4 girtiyên din jî li girtîgeha Qezalhesarê ya Kerecê hatine îdamkirin ku navê wan bi vî awayî ye: Setar Xosrewî, Kamran Seqayî, Ehmed Narewî û Mohd Îshaqzahî.
Settar Xosrewî, girtiyê kurd ê ji bajarê Harsînê parêzgeha Kirmaşanê, Kamran Seqayî, girtiyê bajarê Lêrê yê ji Poldextar a parêzgeha Loristanê û du girtiyên belûc yê bi navên Ehmed Narewî û Mihemed Îshaqzahî, xelkê Zahedan a parêzgeha Sîstan û Belûcistanê ne ku berî niha bi sûcdariya “narkotîkê” hatibûn girtin û bi cezayê hukmê hatibûn mehkûmkirin, hatine îdamkirin.