Merkezê Xeberan- Hemserekanê Meclîsê Caardişî yê Îdareyê Xoserî yê Vakur û Rojhelatê Sûrîye Abdulhamîd El Mîhabşî û Bêrîvane Xalid derheqê serebûtanê peyênan ê herême û hêrişanê Dewleta Tirkîya de beyanat da çapemenîye. Kombîyayîşê çapemenîye de zaf endamê çapemenîye estbî.
Beyanato ke hetê Hemserek El Mîhbaşî ra ame wendene wina yo:
'Dewleta Tirkîya Her Roje Hêriş Kena'
"Hêrişê gemarinî û barbarî yê Dewleta Tirkîya dewam kenê. Şarê Rojawan û Vakurê Sûrîye yo ke vera DAÎŞî şer kerd û bedelê giranî dayî ewro bi teşwîq û tesdîqê Amerîka û Rûsya reyna binê hêrişanê Tirkîya de yo. Armancê Tirkîya no yo ke erdê Rojawanî, Serêkanîye û Girê Sipî ser o ca bido cergan û DAÎŞî. Pêro dinya şahîd a ke Tirkîya DAÎŞ perwerde kena. Ebûbekîr El Bexdadî sînorê Tirkîya ra 5 km dûrî de ame kiştene. Dewleta Sûrîye ne bi xo ne zî erjanê merdimîye û demokrasîyî ser o cewab nêda gef û waştişanê Erdoganî. Derheqê babeta koçberanê Tirkîya de zaf polîtîka û stratejîyî ameyî kerdene. Dewleta Tirkan bi zanayîşî şar waranê înan ra dana koçkerdene. Ma venga pêro merdimîye û dinya danê vera nê herîşanê qirkerdişan vinderê û vera vurnayîşê demografîyî vengê xo berz bikê, vera nê zulmî wayîrê tewirêkî bibê."
'Heta ke Îşxalkerî Nêşorê Menayêka Adirbirnayîşî Çin O'
"Kifş o ke Dewleta Tirkan a îşxalkere pêvînayîşê Erdoganî û Trumpî ra hêz gêna. Trumpî vat 'Adirbirnayîş baş şino û kurdan ci ra qayîl ê'. No rast nîyo. Kesêk zî pê hêrişan û îşxalî qayîl nîyo. Bi se hezaran kurdî, erebî û xiristîyanî bi bombayan û hêrişanê Dewleta Tirkan yenê qetilkerdene, waranê xo ra benê. Heta ke îşxal nêqedo heta ke Dewleta Tirkan a îşxalkere erdê ma ra nêşora ma pê adirbirnayîşî qayîl nêbenê."
Venga Hêzanê Mîyanneteweyan Ame Dayene ke Vera Hêrişan Tewirêk Bimojnê
"Seba ke reyna DAÎŞ merdimîye ser o nêbo bela, rîyê hêrişanê Dewleta Tirkan a îşxalkere ra Rojawanî de û dinya de reyna DAÎŞ ganî nêbo ma venga Amerîka, Rûsya, Koalîsyona Mîyanneteweyî, Yewîya Ewropa, DYA, Yewîya Dewletanê Ereban, Neteweyanê Yewbîyayeyan û Dewleta Sûrîye danê ke vera îşxalê Dewleta Tirkîya bibê wayîrê tewirêkî ke hêzê îşxalkerî erdê ma ra şorê."
Seba Çareserîye Venga Dewleta Sûrîye Ame Kerdene
"Ma venga Dewleta Sûrîye danê ke Dewleta Sûrîye û Esad tevgêrayîş û ziwanê çareserîye awan bikê. Ma sey Sûrîya Demokratîke seba Rojawanî û Vakurê Sûrîye amade yê ke seba çareserîye çi hewce yo bîyarê ca."