Li gor encamên destpêkê yên hilbijartinên şaredariyan li Danmarkê, çar berbijêrên Kurd li wî welatî bûne endamên encûmena şaredariyê û berbijêrek jî ji bo endamtiya Encûmena Herêmî ya Kopenhageng a paytext biserket.
Li bajarokê Albertslund ku 15 kîlometran ji navenda Kopenhageng a paytexta Danmarkê dûr e , 3 berbijêrên Kurd ji 3 partiyên cuda karîne baweriya dengderên wî bajarokî bidest bînin û wek endamên encûmena şaredariyê hatine hilbijartin.
Her sê Kurdên ku wek endamên Encûmena Şaredariya bajarokê Albertslund hatine hilbijartin ev in; Resûl Kuçukakin ji Partiya Sosyalîsta Gel a Danmarkê, Dogan Polat ji Partiya Sosyalîsta Danmarkê û Hediye Temîz ji Partiya Sosyalîst a Lîberal.
Serdar Benlî ku Cîgirê Serokê Partiya Sosyalîsta Gel a Danmarkê ye û pêştir Cîgirê Serokê Şaredariya Gladsaxe bû, duyem zêdetirîn deng li sînorê şaredariya xwe bi dest xistiye û şansê wî heye ku bibe Serokê Şaredariyê.
Herwiha Erdogan Mert, ser bi lîsta Yekgirtî yek ji şeş endamên partiya xwe ye ku biserketiye û dê nûneratiya partiya xwe di Encûmena Herêmî ya Kopenhagen a paytexta Danmarkê de bike.
Ew berbijêrên Kurd ku di hilbijartinên vê carê yên Danmarkê de biserketine, Kurdên Anatoliya Navîn û Enqerê ne û di nîveka salên 60î yên sedsala bihorî de ji bo karkirinê çûne wî welatî.
Li Denmarkê di 16ê Mijdara 2021an de hilbijartin bo 98 encûmenên şaredarî û 5 hikûmetên herêmî hat lidarxistin û li gor zanyariyên Tora Medyayî ya Rûdawê, di hilbijartanan de 60 berbijêrên Kurd ji partiyên cuda yên wî welatî beşdar bibûn, ku tenê 5 kes ji wan biserketine.