Encamên destpêkê yên ne fermî eşkere dikin ku di hilbijartinên parlamentoya Swêdê de heta niha 4 berbijêrên Kurd bi ser ketine.
Li gor zanyariyan, dengdana di sê hilbijartinên Swêdê ku do di saet 08:00 bi dema wî welatî (saet 09:00 bi dema Hewlêrê) destpê kiribû, di saet 20:00an de bi dawî hat û piştî girtina sindoqan û deriyên navendên dengdanê, proseya hejmartina dengan destpê kir.
Medyaya fermî ya Swêdê encamên destpêkê ya ne fermî belav kiriye, partiyên çep zêdetir ji %50.6 dengan û partiyên rast jî rêjeya %48 dengan bidestxistine.
Herwiha li gor encamên destpêkê, heta niha 4 berbijêrên Kurd di hilbijartinên Parlamentoya Swêdê de biserketine.
Navê berbijêrên Kurd ku heta niha dengê pêwîst bidestbixin û derbasî parlamentoya Swêdê bibin, ev in: Kadir Kasirga, Lawen Redar, Serkan Kose, Gulan Avci
Hat zanîn ku Partiya Sosyal Demorkat rêjeya dengên xwe zêde kiriye û zêdetir ji %30.1 dengan misoger kiriye.
Demokratên Swêdê bi zêdekirina dengên xwe %21.3 dengan bidestxistine û niha di pileya duyem de ne û Partiya Moderate jî bi bidesxistina %16.3 dengan heta niha partiya sêyemîn a hilbijartinên Swêdê ye.