Enwer Yılmaz
Nê rojane tengan de dostê ma û merdimê ma yew bi yew bi nêweşîya Korona kewenê û destê ma ra çîyêk nêno ke ma bike. Nê rojan de dosto ercîyaye û doktorê şarî yo welatperwer Şemsettîn Koç nêweş o û na nêweşîya nalete dusyaya ey ro.
Mîyanê nê hewteyî de dostê min o erjîyaye yo ke şarê ma zaf baş şinasneno Dr. Şemsettîn Koç virusê korona kewto. Dr. Şemsettîn Koç hema zî nêweşxane de yo û tedawî vîneno. Wa ey rê zaf kefaret bo.
Dr. Şemsettîn Koç yewêko welatperwer o û seba welatperwerîya xo sey zaf merdimanê ercîyayeyan hetê dewlete ra 3 serrî verê cû amebi îxrackerdiş. Şarê Dîyarbekirî Dr. Şemsettînî zaf baş şinasneno û homa ey ra razî bo ey ra zaf razî yo. Hem mîyanê nêweşanê xo de cîyayî nêkerdêne hem înan dir pê ziwanê înan kurdkî qalî kerdêne û hem zî bi exlaqê xo yê weşî zerrîya înan de ca girewtbi.
La dewlete sey welatperweranê bînan wazîfeyê ey ra ey girewt û ci rê neheqîyêka pîle kerde. Dr. Şemsettîn Koç nika nêweşxaneyêko taybet de xebitîyeno û meslegê xo rê dewam keno. Emser derheqê cuyayîşê xo de kitabêk zî vet û game eşt mîyanê edebîyatî.
Serra 2011î de wexto ke ez televîzyone de şuxulyêne ma yewbînî şinasnabi. Cinîya mi de nêweşîya guwatirî estbî û heta roja emelîyatî ma dir eleqedar bi. No mîyan de Dr. Bahrî Çakabayî dir hewêk, pêroyî de dadîya mi 2 rey emelîyat kerd û dadîya mi nika 83 serrîya xo de weş û war a maşala. Destê ey semedê hezaran merdiman bîyê derman û nika kesê ke hetê ey ra amê dermankerdiş her roj semedê weşîya ey ey rê dûa kenî.
Dr. Şemsettîn Koç sek şarê ma zî baş zano merdimêko durust, qîmetin û welatperwer o. Demêk zî serekîya Odeya Tabîban a Dîyarbekirî kerd. Xeylî wext mîyanê Meclîsa Aşitî ya Tirkîya de ca girewt. Bi namê Arîya, Asmîne û Aşitî 3 heb kênayê ey ê delalî estê. Keso ke kirdkî yan zî kurmanckî zano qetîyen ey dir tirkî qisê nêkeno û her hetê cuyayîşê xo de wayîrê ziwanê xo vejîyayo/vejîyeno.
Serra 2016î de, serra ke îxrac bi ez televîyona JIYAN TV de koordînator bîya. Ma pîya programêkê sihetî organize kerdbi. Brêz Şemsettîn Koç û Doktorê didanan Ahmet Kiliçî pîya hetanî padîyayîşê televîzyone pê ziwanê ma kirdkî program viraşt. Şarê ma pê ziwanê xo hewa ewilî programê sihetî temaşe kerdêne û programî rê eleqa zaf weş bî. Xora şima zî zanî televîyona JIYAN TV hetê hukmatî ra pê KHK amey qefilnayîş û Brêz Şemsettîn Koç zî a serre wezîfe ra ame girewtiş. Ey demek Çewlîg de karê xo domna û agêra Dîyarbekir.
Ez zana nêzana roja ke mi o şinasna ra nat her demê min o teng de halê mi persayo û seba ke ez ziwanê xo de xebate kena qîmet dayo xebata mi hetê mi kerdo. Çendêk mi rê telefon keno hal û xatirê dadîya mi û keyeyê mi pers keno. Zaf rey mi o îxmal kerdo, ez ci nêgêraya la o onca zî mi gêrayo pers kerdo. ma xeylî wext mîyanê Komela Çewlîgjan de xebate kerde û Dr. Şemsettînî çend serrî serekîya Komela Çewlîgijan a Dîyarbekirî kerd. Homa zano hem ez hem zî şarê ma ey ra zaf razî yo. Hem doktorê şarê xo hem ronşvîr û hem zî welatperwerêko ercîyaye yo Dr. Şemsettîn Koç. Merdim çendêk pesnê ey bido kêm o.
La ewro na nêweşîya nalete, nêweşîya janê Korona bîya musalatê ey û nêzdîyê 10 rojîyo ke nêweşxane de yo. Ez ge-ge vana ez şî nêweşxane persê ey bikî, pencera ra veynî ci silam bidî ci la mi ci rê telefon kerd û nê waştişê mi qebûl nêkerd. Na nêweşî hende berbata ke merdim nêeşkeno şêro nêweşê xo bivîno, persê ci bikero.
Nêweşîya Korona roje bi roje dorê ma gêna û heskerdoxê ma zî roje bi roje nêweş kewenê. Dinya de heta nika nêzdîyê 600 hezar merdimi na nêweşî ra merdê û hema zî mirenê. Beno ke ma pêro rojêk bibê nêweş. Nêzana.. Hetêk ra zordestî hetêk ra neheqîya dewelete hetêk ra bêedeletî û na nêweşîya nalete zî nîya ser. Xora cuyayîşê ma bi zehmetî vêreno, welat de hezar problemî estî ke nêameyê safîkerdiş. Nika zî dormeleyê ma de dostê ma nêweş kewenê, nêweşxaneyan de yê û ma nêeşkenê înan pers bike. Axirî telefon esto ke ma eşkenê persê înan bike.
Ez hêvî kena ke na nêweşî hîna zaf vila nêba, nêvîyaro ma, keye û heskerdoxanê ma. Aye ra gere ma pêro xo bipawê, dîqet bikê û tedbîran bigîrê.
Merdim wexto ke beno nêweş ganê merdimi tena nêdejeno. Ganê keyeyê ey û heme heskerdoxanê ey dejeno.
Na wesîle ra ez sere de Dr. Şemsettîn Koç û heme nêweşanê Korona ra şîfa wazena û hêvî kena ke xoce demêko kilm de onca agêro mîyanê ma. Senî ke xoceyî her tewir demê zehmetinî peynîya xo de verdayî, vîyarnayî, ez hêvî kena ke na nêweşî zî vîyarneno û beno weş û war.