Navenda Nûçeyan - Partiya Edalet û Hiqûqê ya li desthilatdariyê piştgirî dide berendam Andrzej Duda. Duda yê 48 salî bi xwe parêzer e, ji sala 2015'an ve Serokomarê Polonyayê ye û niha dîsa bûye berendam.
Duda di mîtînga hilbijartinê ya li navçeya Brzeg de axivî. Wî diyar kir ku gotina siyasetmedarekî din ê mihafezekar ku gotibû "LGBT ne xelk e, bîrdoziyek e" dipejirîne. Duda, LGBT wekî "Bolşevîkiya nû" bi nav kir û diyar kir ku ev tevger ji bo mirovahiyê ji Komunîzmê xirabtir e.
Reqîbê wî yê mezin şaredarê Varşovayê Rafal Trzaskowski ye. Trzaskowski di kampanyaya hilbijartinê de diyar kir ku divê li hemberî hevzayendan bi xweşbînî tevgerin çêbibe. Li ser vê Duda bersiv daye.
Dora yekemîn a hilbijartina serokomariya Polanyayê dê roja 28'ê vê mehê li dar bikeve. Ger ji berendaman yek bi ser sedî 50'î re dengan negire dora duyemîn dê roja 12'yê tîrmehê li dar bikeve.
Anket dibêjin ku dê Duda û Trzaskowski bimînin dora diduyan. Trzaskowski berendamê Platforma Hemwelatiyan e ku alîgirê Yekîtiya Ewropayê ye, Çepên Lîberal û Keskparêz piştgirî didin wî. Trzaskowski jî wekî Duda 48 salî ye.
Dîyarname