Merkezê Xeberan - Çekdarê ke semedê Tirkîya Efrîn de falîyet kenê qezaya Mabata de 11 sivîlî seba fîdye remnayî.
Çekdaran Dewa Racoyî ya qezaya Mabata ya Efrînî de 8 sivîlî remnayî û badê zî keyeyan û merdimanê înan ra fîdye waşt.
Nameyê kesanê ke ameyî remnayîş wina yê: Elî Hemo, Husên Şêxo, Ezîz Şêxo, Betal Mihemed Şêxo, Heysem Remzî Hecî Hemo, Henîf Arif Şerê, Mihemed Birîm û Henîf Henan.
Vajîya ke, Henîf Henan û Mihemed Birîmî dayîşê fîdye ra dima ameyî veradayîş la aqûbetê ê kesanê bînan nêzanîyeno.
Dewa Meimila ya Mabata de zî xeylê sivîlî hetê çekdaran ra ameyî remnayî û nameyê înan wina yê: Lawend Umer Simo (20), Mihemed Menan Birîm (32) û Ciwan Şukrî Umer (20).
Terorîstan 15 rojî verê cû zî kênaya bi namê Meleke Nebîh Xalîl (16) remnabî û meyîtê kêna daristanê zeytûnan de amebi vînayîş.
Menga gulane de vejîyabî werte ke 11 cinîyê ke serra 2018î de ameybî remnayîş 2 serrî înan rê îşkence ame kerdene. 23ê nîsane de Girê Sipî de rîsipîyê êşîra ereban a Neîmî Şêx Înezan amebi remnayene. 4ê nîsane de zî mabênê dewanê Kopirlik û Evdokoyî de 3 sivîlî ameybî remnayene û înfazkerdene. Eynî roje sivîlê bi nameyê Sileman Bekre zî amebi remnayene.