Serokkomarê Sûriyeyê û Serokê HTŞyê Ehmed Şer ragihand ku piştî rûxîna rejîma Beşar Esed "bi hezaran kes" dixwazin beşdarî artêşa nû ya welêt bibin.
Serokkomarê Sûriyeyê Ehmed Şer di hevpeyvîneke podcastê ya ku li Brîtanyayê hat weşandin de eşkere kir ku piştî rûxîna rejîma Beşar Esed "bi hezaran kes" ji bo artêşa nû ya welêt xwebexş bûne.
“Bi hezaran kes tevlî artêşê bûn”
Ehmed Şer diyar kir ku wan li şûna leşkeriya mecbûrî leşkerî ya bi dilê xwe teşwîq kiriye û got, "Îro bi hezaran kes tevlî artêşa nû ya Sûriyeyê dibin."
Şer da zanîn ku piştî rûxîna Beşar Esed, artêş û hêzên ewlehiyê yên berê hatine belavkirin û ji bo leşker û efserên reviyayî navend hatine avakirin da ku rewşa wan were diyarkirin.
Tê texmînkirin ku artêşa Sûriyeyê di salên destpêkê yên şerê navxweyî de ji ber rev û kuştinê nîvê hêza xwe ya 300 hezar kesî ji dest daye.
Artêşa Sûriyeyê ya ku di serdema rejîma berê de bi alîkariya Îran, Rûsya û komên çekdar ên wekî Hizbulaha Libnanê ya nêzîkî Îranê li ser piyan mabû, piştî lawazkirina van borî têk çû.
Bipêşveçûna çekdaran a bi serkêşiya Heyeta Tehrîr El Şamê (HTŞ) têkçûna artêşê lezgîntir kir.
Şer got, xizmetkariya leşkerî ya mecbûrî dibe sedema wê yekê ku ciwanên ji welêt birevin û rêvebiriya nû xebatan dike da ku komên çekdar ji bo ewlehiyê tevlî artêşa neteweyî bibin.
Wî bi bîr anî ku bi taybetî li bakurrojhilat di navbera komên nêzîkî Tirkiyeyê û Hêzên Sûriyeya Demokratîk (HSD) de pevçûn berdewam dikin.
“Sedema dorpêçan nemaye”
Ehmed Şer ji civaka navneteweyî xwest ku dorpêçên li ser Sûriyeyê rakin û got:
"Ev dorpêç ji ber sûcên sîstematîk ên rejîma berê hatibûn sepandin. Lê niha ji ber ku rejîm hilweşiyaye êdî ti sedem ji bo van dorpêçan nemaye."
Şer tekezî li ser wê yekê kir ku welat bi pirsgirêkên mezin ên ewlehiyê re rûbirû ye û got:
“Yek ji rêyên çareseriyê bipêşketina aborî ye. Bê geşbûna aborî aramî pêk nayê. Bê aramî jî kaos û bêewlehî çêdibe."