Hetêk ra janê Korona hetêk ra zî krîzo ekonomîk; esnafê Amedî mîyanê tengasîyêka pîle de yê. Esnafî îfade kenê ke reşwa înan xirab a û eke wina dewam bikero ê do dikananê xo biqefilnê.
Semtê Dîclekentî yê Amedî de tewr tay 150 dikanî û kargehî estê. La esnafî ver bi îflasî de yê. Hetêk ra janê Korona heto bîn ra krîzo ekonomîk; esnafê Amedî mîyanê tengasîyêka pîle de yê. Semedo ke dikanî Korona ra qefilîyayî bi seyan karkerî zî bêgure mendî.
Sezer Tugrulo ke 15 serrî yo Dîclekent de salona ci ya arayî esta vano; Pandemî ra 8 aşman ra nata kargehê mi girewte yo û 15 xebatkarê mi zî karî ra vejîyayî.
Tugrulî vat: ''Dewlete destek nêdana ma. Embazê ma nêeşkenê faturayanê xo bidê. Dikanê mi girewte yo la ez hema zî kîra dana. Dewlete heqê awe û ceyranî zî wazena. Eke rewşe wina dewam bikera ez do dikana xo binî ra biqefilna. Her kes wina perîşan bîyo.''
Cafer Tayinlamak zî Dîclekent de kafeyê ey esto û o zî hînî nêeşkeno debarê xo bikero. Tayinlamakî vat: ''Mi neçarîye ra 13 xebatkarê xo karî ra vetî. Ma heta ewro destekêk zî nêgirewt. Esnafan rê ganî paştî bêra dayene.''
Adem Deger zî wayîrê lokanta yo û ey zî prosesê pandemî de 25 xebatkarê xo karî ra vetî. Degerî vat: ''Ganî ma rê hetkarîya kîra û masrafan bêra kerdene. Zengînî benê hîna zengîn xizanî zî hînî benê xizan. Dewlete têna zengînan rê hetkarîye kena.''
Mehmet Altunbay zî Dîclekent de wayîrê dikana datlîyan o. Altunbayî vat: ''Ez şermî ra nêeşkena biewna rîyê xebatkaranê xo. Nika ê pêro bêkar ê û nêeşkenê karêk bivînê. Çewî zî hetkarîya ma nêkerde. Zaf merdimî mexdûr bîyî. Mi 40 xebatkarê xo neçarîye ra karî ra vetî.''!"