Esnafê Bazarê Xeleyî ê Ruha ke karê naklîcitî kenê, vayîya mazot û lastîkê wesayîtan ver îflas kerd. Nakliyecî Bozan Yahnîoglu vano ke, emser esnafê qijî perişan ê. Êyê ke mesûlê eknomîya welatî yê, xemê înan de nîyo halê ma.
Esnafê ke Bazarê Xeleyî yê Qezaya Eyubîye de karê naqliyecitî kenê krîzê ekonomi ver yew bi yew îflas kenê. Bi ameyîşê mewsîmê hamnanî herêma Kurdan de xele, vaş, cew û nîske yena çînayîş. Çînayîşê cew, xele û nîske ra pey karê naqliyecitîya cew û nîskan dest pêkerd.
Kesê ke karê naqliyecitî kenê vayîya mazot û lastîkan ver perişan ê û her roj zerar kenê. Esnafê ke Ruha de nê karî kenê vanê: Ma zerar ver êdî dikananê xo qefilnenê.
Esnaf Bozan Yahniogluyo ke Bazara Xeleyî de karê naqliyecitî keno wina va: Ez 20 serrîyo ke nê karî kena. Mîyanê 2-3 serranê peyênan de sektorê karê neqlîyecitî hînî îflas kerd. No sektor hînî kar nêkeno. Polîtîkayê dewlete sektorê naqliyecitî qedîna. Esnafê qijî perîşan ê. Êyê ke mesûlê eknomîya welatî yê, xemê înan de nîyo halê ma.
KRÎZÊ EKONOMÎ ESTO
Esnaf Mahmut Kirbogayî zî îzeh kerd ke heme esnafê bazarî mîyanê zerarî de yê û wina va: "Krîzê ekonomî ver halê ma rind nîyo. Ez hînî nêeşkena çîyêk qezenc bikî. Mazot û lastîk her roj benê vay. Par lastîk bi hezar û 500 TL bi, emser diqat zêde bîyo û nika bîyo 3 hezar lîre. Sîgorta zêde ya.”