Peymana Lozanî roja 24.07.1923î de, şaristanê Lozanî yê Îsvîçre de, mabênê Dewleta Tirkîya, Îngîltere, Fransa, Îtalya, Japonya, Yûnanîstan, Romanya, Bûlgarîstan, Portekîz, Belçîqa û Yûgoslawya da ameye îmze kerdene. Xeylê babetê na peymane estbî. La babeta esasî, parekerdişê erdê Kurdistanî yo ke binê kontrolê Osmanîyan de bi ya.
Bi Peymana Lozanî erdê Kurdistanî ke bine kontrolê Osmanîyan de bi mabênê Dewleta Tirkîya, Îngîltere û Fransayê de ame pare kerdene. Badê cû qismo ke destê Îngîltere de bi Dewleta Iraqî rê, qismo ke destê Fransayê de bi zî Dewleta Sûrîye rê mend.
Peymana Lozanî rayîr akerd ke Kurdistan newe ra bêro dagir kerdene û nika zî nê esasî ser o Kurdistan hetê Dewletanê Tirkîya, Îran, Iraq û Sûrîya ra ameyo dagir kerdene.
Peymana Lozanî, çîne hesibnayîş û binpay kerdişê îradeyê şarê Kurdistanî ya, ne meşrû, ne hiqûqî ya.
Tekoşînê azadîya Kurdistanî yê her çar perçeyanê Kurdistanî, her roj, bi dest vistişanê muhîm yê tarîxîyan, derb dano Peymana Lozanî ro.
Tu şikê ma ci ra çino ke rojêk do bêro, şarê ma bi têkoşînê xo û bi hetkarîya dostanê xo yê mîyannetewî, na peymana qilêrine bierzo mîyanê çopê tarîxî û her çar perçeyê Kurdistanî zî azadîya xo bigîrê xo dest.
Serrgêra Peymana Lozanî ya 99ine de ma veng danê Dewletanê sey Îngîltere, Fransa, Emerîka, Rûsya, Almanya û dewletanê dinya êyê ke akrorê esasî yê, wa na neheqîya ke bi Peymana Lozanî şarê Kurdistanî rê ameya kerdene telafî bikê, na neheqîye werte ra wedarê..
No demek o ke Rojhilatê Mîyanênî de newe ra xerîtayî yene viraştene, heme dewletê dinya ganî her çar perçeyanê Kurdistanî de, hetkarîya heqê azadî, statuteyêka sîyasî,coxrafî, neteweyî û xo bi xo îdare kerdişê şarê Kurdistanî bikê. Ma veng danê şaranê ê dewletanê dinya ke, wa hêzê xo ser hukmetanê dewleta xo ronê, bibê hetkar ,dost û aktorê destvistişê azadîya şarê Kurdistanî.
Peymana Lozanî helbet ke pê estbîyayîş, têkoşîn, yewitî û îtifaqê şarê Kurdistanî yê netewî, demokratîk do bêro çîne kerdene. Şarê Kurdistanî ganî pê sebir û pê sîyasetêko aqilane, meydanê mîyannetewî de dostanê xo zêde, dişmenanê xo kêm biko ke ma bieşke prosesê azadîya her çar perçeyanê Kurdistanî lezêr bike.
24.07.2022
Buroya Çapemenî û Têkilîye ya PAKî