Keyeyê Gulîstane Doku yo ke Dêrsim de semedê vînayîşê kênaya xo çalakîya roniştişî keno vat heta vînayîşê Doku ê do mevindê.
Wendekara Zanîngehê Munzurî Gulîstane Doku 5ê çeleyê 2020î ra nata vînîbîyaye ya. Keyeyê Doku bi wesîleya serrgêra vînîkerdişê kênaya xo verê Edlîyeya Dêrsimî de dest pê çalakîya roniştişî kerd. Çalakîya roja çarine de dewam kerd.
Babî Halît Doku, dayîke Bedrîye Doku û waye Aygul Doku ewro zî verê Edlîyeya Dêrsimî de bî. Endamanê Baroyê Dêrsimî û Platformê Keye û Demokrasîyî yê Dêrismî zî paştî daye çalakîye.
Dayîke Bedrîye Dokuya ke çar rojî yo çalakîye de ya vat: ''Sebi kênaya mi? Abarakovo babîyê ci polîso têna keyeyê ci ame gêrayene. Dadî û babîyê ci îfadeyê cîyayî dayî la rixmê naye derheqê ey de cipersayîş nêdîya destpêkerdene. Vanê kênaya mi xo kişto, eke xo biştayêne cenazaya ci ameyêne vînayene.''
Babî Halît Dokuyî zî vat ê mabênê Dêrsim û Amedî ra şinê yenê û vat: ''Kênaya mi xo nêkiş, înan aya kişt. Înan kênaya mi vînî kerd û di serrî yo nêvînenî. Ma esteyanê kênaya xo wazenê. Yew bajaro ke her hetê ci de kamerayî estî de kênaya mi nêvînenê. Walîyê dewrî vatibi 'mirçike fir bido hayîya ma pê bena' Qeyl Gulîstane nêvînenê? Wazneê serê ci bigêrê.''
Vizêr keyeyê Doku banê walîtîye de Walî Mehmet Emîn Ozkan û Serdozgerîya Komare reyde pêvînayîş kerdbi. Keyeyî badê pêvînayîşî dabi zanayene ke înan pêvînayîşê bi selahîyetdaran ra netîceyêke nêgirewto û heta vînayîşê kênaya xo do çalakîyanê xo bidomnê.