HAK-PAR (Partîya Heq û Azadîyan), PAK (Partîya Azadîya Kurdistanî) û PSK (Partîya Sosyalista Kurdistanî): Hêvîyama na ya ke,Newroze sey her name û muhtewaya xo, biba destpêkê rojanê neweyan her cayê Kurdistanî de.
“Newroze tarîxê Kurdistanî de rojêka bimbarek a. Kurdî,verê mîladî, serra şeşt sey û duwês (BZ 612) ra hetanî ewro bêvindertiş sey roşan û festîvalêk Newroze pîroz kerdê, qîmetêko pîl dayê na roje. Roja 21ê Adare semedê Kurdan nîşanêka netewî ya. No semed ra Newroze Kurd a. Newroze rojêka newîya ke Kurdî na roje zulmî ra xelisyayî. Kawa vîrê netewî yê Kurdan de sey qehremanêko bêemsal ameyo qebûl kerdene. Roja 21ê Adare destpêkê wisarî ya û wisar mijdanîya weşî, bereket û rojê serfirazî xo dir ano.
Newroze; xiyalê ma de, xiyalê Zerdeştê kalî de hêvî û waştişêk a...
Newroze, semedê Kurdan destpêkê rojêka bixeyre û bereket a.
Şarê Arî roja Newroze sey “serrnewe” zanê û bi no qayde bimbarek kenê. La Newroze semedê Kurdan tena serrnewe nîya, hetêk ra destpêkê rojeka newîye ya. Newroze, neweroj a, yanî roja newîye ya. Efsaneyê Newroza Kurdan bi serebûtêko netewî vajîyeno.Tarîx dano zanayîş ke, îqtîdarê zordest yê Dehaqî, paytaxtê Medan Nînowa de, bi têgêrek û bi rayverîya Kawayê Kurdê asingerî rijyayo. No semed ra ke Newroze semedê Kurdan nîşana estbîyayîş û azadî ya. Kurdî çiqas zî bi Newroze fors bikê, heqê înan o.
Zanîyeno ke UNESCOyî edetê Newroze sey mîrasê merdimatî qebûl kerdo û Newroze sey roşan 2 hezar serran ra zêdêro ke mîyanê şaranê Arîyan de yeno pîroz kerdene. Newroze hînî roşanêko mîyannetewî yo.
21ê Adare hetêk ra zî Roja Têkoşînê Vera Nîjadperestî ya Mîyannetewî ya. Roja 21.03.1960î de Efrîqaya Başûr de vera nîjadperestî xoverrodayîş dest ci kerd. La xoverrodarî rastê hêrîşêkê çekdarî ameyî û 69 kesî ameyî kiştene. Netewê yewbîyayî semedê yadkerdişê ê qetlîamî serra 1966î de roja 21ê Adare sey Roja Têkoşînê Mîyannetewî ya Vera Nîjadperestî qebûl kerd.
Waye û birayê ercîyayî;
Ma nîyet kerdbi ke ma her hîrê partîyê Kurdî HAK-PAR, PAK û PSK roşanê Newroze bi qefle û bi coş pîya pîroz bikê. La çi heyf ke ma pêro Newroza emserî xemgîn vîyarnenê. Zanîyeno ke koronavirûso newe roj bi roj her ca de vila beno û sey tehlûkeyêkê mîyannetewî îlan bîyo. Semedê pawitişê weşîya şarê ma,ma do çalakî û şayîya Newroza emserî betal kerda.
Miletê Kurd weş zano ke Newroze, roja estbîyayîş û serkewtişî ya.
Newroze,rojêka newîye, cuyo newe, îradeyêko newe, eşqêko newe, zerrîyêka newîye û dinyayêka newîye ya.
Newroze, seba her Kurdêk sondêk a.
Newroze, extêk û bextêk rayîrê azadîya Kurdistanî de…
Bi hêvîya ke, armanc û waştişê şarê Kurdistanî bêro ca.
Ma hêvîdarê ke Newroze biba çare û dermanê dejê Kurdan.
Hêvîya ma na ya ke,Newroze sey her name û muhtewaya xo, biba destpêkê rojanê neweyan her cayê Kurdistanî de.
Bi minasebetê Newroze, ma newe ra venga heme hemwelatîyanê xo û heme merdimatî danê ke, wa vera Vîrusê Korona tedbîranê muhîman bigîrê û xo û dormeleyê xo nê tehlûkeyî ra bipawê.
Biciwîyo Newroze
Heme rojê şima Newroze bê.
Newroza şima pîroz bo.”
20.03.2020
HAK-PAR (Partîya Heq û Azadîyan)
PAK ( Partîya Azadîya Kurdistanî)
PSK (Partîya Sosyalista Kurdistanî)