Partîya Heq û Azadîyan (HAK-PAR), Partîya Demokrate ya Kurdistanî-Bakur (PDK-BAKUR), Partîya Sosyalîste ya Kurdistanî (PSK), Partîya Welatparêzanê Kurdistanî (PWK), şanê pancşeme, 20ê Adara 2025î, Amedî de, Meydanê Şêx Seîdî de, bi Alaya Kurdistanî û meşaleyan reyde Roşanê Newroze pîroz kerdî.
Pîrozî de seba şehîdan rêz ame girewtiş û beyanato muşterek ê HAK-PAR, PDK-BAKUR, PSK, PWKyî bi kurdkî ame wendiş.
Reyna Serekê Pêroyî yê PWKyî Mustafa Özçelik û Serekê Pêroyî yê PSKyî Bayram Bozyel, îdareker û endamê HAK-PAR, PDK-BAKUR, PSK, PWKyî, zaf ronişvîrî û sîyasetmedarê kurdî û beşdarê na pîrozîya newroze bîyî.
Beşdaran bi slogananê "Biciwîyo Newroz, Biciwîyo Kurdistan" û bi ahenga erbaneyî govend girewte.
Pîrozîya newroze ya ke hetê HAK-PAR, PDK-BAKUR, PSK, PWKyî ra Amedî de, Meyanê Şêx Seîdî de amebi organîzekerdiş, bi coş û weşî qedîya.
Eno zî beyanato muşterek yê HAK-PAR, PDK-BAKUR, PSK, PWKyî o derheqê Newroze de yo:
SEMBOLÊ AZADÎ Û XOSERÎYE NEWROZ PÎROZ BO
Ewro roja Newroz a.
Newroz sembolê azadî û xoserî ya.
Ruho serehewanayîşê Kawayî yo ke vera zalim Dehaq de yo.
Newroz vîrardişê têkoşînê ma yê azadîye yê 3000 serrî ya.
Emser ma reyna Newroz bi coşêka pîl, bi bawerîyêka xorîne ya azadîye û bi hêvîyêka xurte ya serkewtiş reyde pîroz kenê.
Ma bi qerardarîye zincîrê koletîye yê ke şarê ma rê ameyê dayene şiknênê, rayîrê serkewtişî bi cesaret û sebir game bi game ronenê.
Her bindestîye ra dima ma newe ra benê, deyîra serkewtişî yew neslî ra resnenê neslêko bîn.
Amed de, Mehabad de, Hewlêr de, Qamişlo de, ma seba azadîya Kurdistanî hîna zêde yewbînî reyde girêdayê yê.
Ma demêko tarîxî ra vîyarenê ke no dem derheqê qederê şarê Kurd û Kurdistanî de yo.
Zêde nê, 34 serrî verê cû, bi raperîn beşêka muhîme ya Kurdistanê Başûrî dagirkerdiş ra ameya xelaskerdiş û her çiqas hîna zî Kerkuk û zaf cayê bînî binê dagirkerdiş de bibê zî, 20 serrî yo ke şarê ma resayo yew statuyê azad û federal. Êdî qederê ma yo xirabîye bedilyayo.
Nê rojan de şarê ma Başûr-Rojawanê Kurdistanî de berê fersendanê dîrokîyan akeno.
Çar hetê dinya de, zerîyya Kurdan ewro seba Rojawanê Kurdistanî dejeno.
Rojawa de ê rojî nêzdî yê ke şarê ma do welatê xo de bi hawayêko azad û bi rûmet biciwîyo.
Tarîxê ma yo têkoşîna dewlemend û tecrubeyê ma reyde tu asteng çin o ke ma nêşkê derbaz bikerê.
Ma şik nêkenê ke ma do Rojawa de bi yewîtî, piştgirî û fehmê hempîyayîya neteweyî ser bikewê.
Ma do statuyê federalî yo ke ma dest visto bipawê û bikerê mende; ma do sey nûrê çimanê xo Başûrê Kurdistanî rê wayîr vejîyê. Seba ke a xeyala ma pêrune û hêvîya ma ya.
Ma do Rojhelatê Kurdistanî de, seba xeripnayîşê qeleyanê zordarîya kolonîyalîzmî, alaya ke Qazî Mihemed girewta hîna berze bikerê.
Ma do Bakurê Kurdistanî de yewîya xo hîna zêde bikerê ke çek û şer biqedîyo û şarê Kurd bireso heqanê xo yê neteweyî û demokratîkan. Na mesele de mesulîyetêko en pîl keweno ma ser.
Seba azadîya şarê Kurdî û Kurdistanî, ma qerar dayo ke ma bingehanê neteweyîyan ser yewîtîya xo awan bikerê. Ma do xebata yewîtîya neteweyî her roje hîna xurt bikerê.
Newroz bihar o, destpêkerdişêko newe yo, îradeyo newe ra awan kerdiş o.
Bêrê, na Newroze de dormeleyê nasnameyê ma yê neteweyî, ziwanê ma yo weş, erjanê ma yê neteweyî û dîrokîyan de ma hîna zêde yewbînî reyde girêdayî bibê.
Bêrê, seba ke nasnameyê Kurdî û estbîyayîşê neteweyî bireso statuyê qanûnê bingeyî, Kurdkî bibo ziwanê perwerdiş û ziwanê resmî, seba wedaritişê astengê ke verê organîze bîyayîşê ma yê azadî de yê, seba ke hemê girewteyê sîyasîyî biresê azadîya xo, ma xo seferber bikerê.
Bêrê, bi şuur û zanayîşê tarîxî û bi hîsê hişmendîya neteweyî ma destpêkerdişêko newe bikerê.
Ruhê Newroze emir keno ke ma newe ra dest pêbikerê. Felsefa Newroze ma rê vana ke ma hêvî û têkoşîne hîna zêde bikerê.
Hanîyo ewro Newroz o.
Tam wextê aye yo; Seba newe ra dest pêkerdişî, seba ke hêvî bibo, azadî û ma xoserîye hîna berz bikerê, seba ke deyîrê serkewtişî hîna xurt vajê...
Emser ma adirê Newroze hîna zêde webikerê.
Ma eşkenê Newroza 2025î bikerê destpêkerdişêk seba azadîye..
Newroza şarê Kurdî û Kurdistanîyan pîroz bo.
20ê Adare 2025
Partîya Heq û Azadîyan (HAK-PAR)
Partîya Demokrate ya Kurdistanî-Bakur (PDK-Bakur)
Partîya Sosyalîste ya Kurdistanî (PSK)
Partîya Welatparêzanê Kurdistanî (PWK)