Kurdên êzîdî dibêjin, hetanî tevahiya girtî û revandiyên me venegerin nav malbatên xwe, cejnên me timam nabin û em jî kêfxoş nabin.
Navenda rewşenbîrî û civakî ya Laliş li Duhokê, li ser cejn û pîrozbahiyên helkeftên kurdên êzîdî peyamek belav kiriye û ragihandiye, hetanî tevahiya girtî û revandiyên êzîdî, yên ku di destê terorîstên DAIŞê de mane, venegerin malên xwe, cejnêd êzîdiyan timam nabin û êzîdî jî kêfxoş nabin.
Di peyama navenda Laliş de hatiye gotin, divê çarenivîsa wan êzîdiyên ku wenda ne were eşkerekirin. Ji ber ku heta noke du hezar û 930 kes wenda ne ku hezar û 330 jê jin û yên din jî zilam in.
Navenda Laliş daxwaz ji aliyên pêwendîdar kiriye hewla dîtin û berdana wan revandiyan bidin û ewên ku destê wan di kuştin, revandin û firotina êzîdiyan de hebûne jî bên dadgehîkirin û cezakirin.
Di dûmahîka peyama navenda Laliş de hatiye gotin: “Noke rê û resmên cejna Çilê Havînê dest pê kirine. Em germtirîn û ciwantirîn pîrozbahiyan arasteyî êzîdiyan li Kurdistan, Iraq û cîhanê dikin. Em hêvîdar in cejn bibe sebeba xêr û xoşî û aşitiyê bo hemiyan. Em dîsa dibêijn hetanî hemû girtiyên êzîdî venegerin, cejnêd me timam nabin.”