Komîsyona Jinan û Komîsyana Girtîgehan ên Şaxa Komeleya Mafê Mirovan (ÎHD) a Amedê, ji bo girtiya nexweşîna giran Sîse Bîngol (85) a li Girtîgeha Jinan a Tîpa T a Tarsûsê dihat girtin û di 2'yê Mijdarê de ji bo dermankirinê sewqî nexweşxanê hat kirin, li avahiya komeleyê daxuyanî da çepemeniyê.
Endama komîsyonê Ezgî Sila Demîr daxuyanî da û bi bîr xist ku nexweşiyên kezeb, dil, mîzdank, astim, tansiyon û gelek nexweşiyên din bi Sîse Bîngol re hene. Demîr diyar kir, gelek ji van nexweşiyan di rapora tenduristiyê de jî cih digirin û hinek ji wan li raporê nehatine nivîsandin. Ezgî Sila Demîr got, "Ji ber ku nexweşiyên wê lê giran kirine, rakirine nexweşxaneyê û li qawîşa mehkûman a li nexweşxaneyê tê hiştin. Rewşa wê ya tenduristiyê giran e."
Di daxuyaniyê de hat ragihandin, hiştina girtiyên nexweş li girtîgehê û astengkirina tedawiya wan li gorî pîvanên hiqûqa gerdûnî tê wateya êşkenceyê û binpêkirina qedexeya li ser kiryarên xerab.
Di dawiya daxuyaniya ÎHD'ê de hate gotin, "Em merhemetê, ûjdan û qenciyê naxwazin. Ji bo Sîse Bîngol û girtiyên nexweş em daxwaza mafê jiyanê dikin."
(MA)