Komeleya Heqanê Merdiman a Amedî 'Raporê Binpaykerdişanê Heqanê Merdiman ê Herêma Rojhelat û Rojhelatê Başûrê Anatolia yê 2020î' eşkera kerd. Goreyê raporî bi hezaran binpaykerdişê heqanê merdiman qewimîyayî.
Komeleya Heqanê Merdiman a Amedî 'Raporê Binpaykerdişanê Heqanê Merdiman ê Herêma Rojhelat û Rojhelatê Başûrê Anatolia yê 2020î' bi kombîyayîşêkê çapemenîye eşkera kerd. Serekê Şubeyê Amedî yê ÎHDyî Abdullah Zeytun û îdarekarê ÎHDyî beşdarê kombîyayîşî bîyî.
Verî Hetkara Hemserekanê ÎHDyî Rehşane Bataray Saman qisey kerd û ard ziwan ke ganî Tirkîya derheqê Selahattîn Demîrtaşî de bira MHME bîyara ca. Rehşene bale ante tecrîdê Îmraliyî û grevê vêşanîye yê tepişteyan ser û pare kerd ke ganî waştişê tepişteyan bêrê caardene û tecrîd bêro qedînayene.
Detayê raporê ÎHDyî wina yê:
-Hêzanê asayîşî 5 kesî kiştî û 10 kesî birîndar kerdî.
-Zîndanan de 7 tepişteyî merdî.
-2 îdarekarê partîyan, 3 rojnamegerî û 3 xebatkarê weşîye maruzê hêrişan bîyî.
-Hêrişanê çekdaran de 43 wezîfedarê asayîşî merdî, 30ê ci birîndar bîyî. 218 milîtanê rêxistine merdî.
-Çalakîyanê çekdaran de 15 kesî merdî, 23 kesî birîndar bîyî. 8 kesî zî hetê milîtananê rêxistinan ê çekdaran ra kişîyayî.
-Mayinan ra domanêk merd û 4 kesî birîndar bîyî.
-8 domanî, 37 cinîyî û 10 camêrdî pîya 55 kesî bi hawayêkê şikdarî merdî.
-4 şaristanan û 13 qezayan de xeyêl warî 10 reyan sey herêma asayîşê taybetî ameyî îlankerdene.
-3 şaristanan, 96 tax/dewan û dewekan, 8 qezayan de 13 reya qedexeyê tebervejîyayîşî ame îlankerdene.
-Cenazaya milîtanêkê rêxistine bi rayîrê PTT erşawîya keyeyê ci.
-Gor û goristanê milîtananê rêxistine tewr tay 8 reyan ameyî texrîbkerdene.
-Gorêko komkî dîya ke tede cenazayê 40 kesan estbî.
-Herême de 38 cinîyan xo kişt, 4 cinîyan zî xîret kerd ke xo bikişê. 34 cinîyan şîdetê zereyê keyeyî ra dinyaya xo bedilnaye, 33 cinîyî şîdetî ra birîndar bîyî. 3 cinîyî maruzê îstîsmarî bîyî. 17 cinîyî şîdetê komelî ra merdî. 12 cinîyî maruzê hêrişî bîyî. 17 cinîyî maruzê tacîzî bîyî. Cinîyêke rê fuhuş ame ferzkerdene.
-4 domanan xo kişt, domanêk xîret kerd ke xo bikişo. 7 domanî şîdetî ra birîndar bîyî. 2 domanî ameyî îstîsmarkerdene. 3 domanî şîdetê komelkî ra merdî. 217 domanî maruzê tacîzî bîyî.
-12 kesî nezaretan de maruzê îşkence û kerdişê xirabî mendî. 97 kesî zî teber de maruzê nê kerdişan bîyî. 54 tepişteyî zîndanan de maruzê îşkence û kerdişê xirabî bîyî. Hêzanê asayîşî 13 kesan rê ajanîye ferz kerde û 18 kesan rê gef wend.
-16ê ci domanî 1550 kesî ameyî destbendkerdene. 2ê ci domanî 310 kesî ameyî tepiştene. 22 kesan rê cezaya hepsê keyeyî dîyaye. Hêzanê dewlete eşt 1345 keye-kargehan ser.
-Derheqê 183 kesan de 29 dosyayan de tehqîqatî ameyî akerdene. 17 dosyayanê dewayan de 119 kesan rê dewa ameye akerdene.
-9 bînayê partîyan, 2 bînayê komeleyan û 3 bînayê şaredarîye maruzê hêrişî bîyî. Kongreya Komelê Demokratîkî ame morkerdene, kerdişê Partîya Dempkratîke ya Kurdan ameyî vindarnayene.
- 72 reyan tay şaristanan de qedexeyê aktîvîteyan ame îlankerdene.
-496 tepişteyî ameyî surgunkerdene. Heqê weşîye yê 69 tepişteyan ame binpaykerdene. 15 tepişteyî maruzê tecrîd û îzolasyonî mendî. Derheqê 4 tepişteyan de tehqîqatî dîyayî destpêkerdene.
-Bêasayîşê karî ra 18 karkerî merî, 2 karkerî birîndar bîyî. 418 karkerî karî ra ameyî vetene. 3 xebatkarê umûmîye ameyî surgunkerdene.
-4 şaristanan, 8 qezayan û bajarekan rê qeyûmî ameyî tayînkerdene. 34 endamê Meclîsê Şaredarîye wezîfe ra ameyî girewtene.