Şandeke Hindistanê bi serokatiya Wezîrê Dewletê yê wî welatî yê bo Karûbarên Derve, Vellamvelly Muraleedharan serdana Herêma Kurdistanê kiriye û biryar e bi amadebûna wî wezîrê Hidistanê, peykerê serkirdeyê mezin ê Hindistanê, Mahatma Gandhî li parkeke Hewlêrê bê danîn.

Wezîrê Dewletê yê Hindistanê yê bo Karûbarên Derve, Vellamvelly Muraleedharan êvara Duşemî 16ê Îlonê gihîşt Hewlêra paytexta Herêma Kurdistanê.

Muraleedharan û şanda pê re li Balafirxaneya Navdewletiya Hewlêrê ji aliyê Berpirsê Fermangeha Peywendîyên Derve yê Hikumeta Herêma Kurdistanê Sefîn Dizeyî ve hate pêşwazîkirin.

Muraleedharan dê di serdana xwe ya bo Hewlêrê de, ligel berpirsên Herêma Kurdistanê bicive.

Herwiha biryar e îro Sêşemî 17ê Îlonê saet 15:00, bi amadebûna Wezîrê Dewletê yê Hindistanê yê bo Karûbarên Derve û hin rayedarên Hikûmeta Herêma Kurdistanê, li Parka Samî Ebdulrehman a Hewlêrê perde li ser peykerê rêber û serkirdeyê mezin ê Hindistanê, Mahatma Gandhî bê rakirin û peykerê wî li vê parka Hewlêrê bê danîn.

Kurdistan û Hindistan hewl didin peywendiyên xwe yên dîplomatîk û aborî pêş bixin û di vê çarçoveyê de Hindistanê li Hewlêrê konsulxaneya xwe li Hewlêrê vekiriye.

Herwiha di van çend salên dawiyê de, çendîn rayedarên Hindistanê jî serdana Herêma Kurdistanê kirine.

Tevî wê yekê, hejmareke zêde ya karkerên Hindistanî jî li Herêma Kurdistanê kar dikin.

RÛDAW