Di encama bombebarana balafirên şer ên Îsraîlê ya li ser herêmên cuda yên Sûriyeyê de herî kêm 13 kes mirine.
Şeva borî balafirên şer ên Îsraîlê Navenda Lêkolînên Zanstî ya li Şamê, balafirgehên Hema û T4 jî di nav de çend herêman li Sûriyeyê bombebaran kirin.
Di van demên dawî de tê îdiakirin ku Tirkiye dixwaze li Balafirgeha T4ê baregehek ava bike.
Artêşa Îsraîlê da zanîn ku wan jêrxaneyên leşkerî yên artêşa berê ya Sûriyeyê kirine armanc.
Artêşa Îsraîlê ragihand kir ku balafirgeha herî mezin a leşkerî ya artêşa berê ya Sûriyeyê ya li Derayê kiriye armanc.
Rrayedarên parêzgeha Hemayê ragihand ku di encama êrişê de herî kêm 9 kesên sivîl mirine.
Wezareta Karên Derve ya Sûriyeyê jî di daxuyaniyekê de êrişên Îsraîlê şermezar kir û ew wekî "binpêkirineke mezin a serweriya axa xwe" bi nav kir.
Ajansa Fermî ya Sûriyeyê (SANA) jî ragihand ku Îsraîlê navenda lêkolînan a parastinê ya Sûriyeyê ya li Şamê kiriye armanc.
Wezareta Karên Derve ya Sûriyeyê jî ragihand ku Îsraîlê "pênc herêmên cihê yên li Sûriyeyê kirine armanc û ev bûyereke nerewa ye û hewldaneke bi zanebûn e ji bo afirandina bêîstiqrariyê li Sûriyeyê û zêdekirina êş û azarên gelê Sûriyeyê."
Artêşa Îsraîlê jî di daxuyaniyekê de got: "Şiyanên leşkerî yên Sûriyeyê li Hemayê û Balafirgeha Hewayî ya T4ê ya li parêzgeha Humsê kirine armanc, digel paşmayiyên şiyanên leşkerî yên Sûriyeyê li Şamê."
Derbarê êrişa li ser Balafirgeha Hewayî ya T4ê de, çavkaniyên xwecihî yên Sûriyeyê dibêjin ku çar kes hatine kuştin ku karmendên Wezareta Parastinê ya Sûriyeyê bûn.