Hemserekê KAYY-DERî vera pojeyê madenî yê Gêxî-Azarpêrtî nêrazîbîyayîşê xo mojna û vat: ''Înan xora serê Çewlîgî qedîna nika zî çim verdayo binê Çewlîgî.''
Yeno waştene ke serê erazîyê dewanê Arex, Cevîzlî, Aysakli, Îlbey, Maltepe, Mirzîkan, Mexsîkan, Suznut, Kusmur, Şorîk û Birîkanî yê qezayanê Gêxî û Azarpêrtî de warê 464 hezar hektarî de madenê çînko-sim-erjîjî bêro akerdene. ÇEDî rixmê nêrazîbîyayîşanê şar û rêxistinanê herême zî seba madenî raporo pozîtîf da Şîrketa Bîngol Metal-Madencîlîkî.
Komeleya Kultur, Hetkarî û Averberdişî ya Gêxî, Depe, Azarpêrt, Xorxol û Çêrme (KAYY-DER) zî tede 84 rêxistinê komelê sivîlî serkêşîya Platformê Xoza yê Gelîya Pêrî siba do derheqê babete de Arex de eşkerayîyêke bidê.
Hemserekê KAYY-DERî Ahmet Tuzunî derheqê tesîran û netîceyanê projeyê madenî zî Ajansê Mezopotamya rê qisey kerd.
Tuzunî da zanayene Şîrketa Bîngol Metal Madencîlîkî verî zî seba ke Arex de bigêra madenî muracat kerdbi la 2018 de nêrazîbîyayîşê şarî ser o no proje amebi betalkerdene. Tuzunî pare kerd ke nika heman şîrkete seba ke erazîyêkê hîna hîrayî ser de projeyê madenî bîyara ca muracat kerdo.
Tuzunî vat: ''Par ma kombîyayîşê şarî kerd û nêrazîbîyayîşê xo ardî ziwan. Rixmê ney zî 6ê hezîrane de ÇEDî raporo pozîtîf da na şîrkete.20 serran de înan serê Çewlîgî qedîna, nika zî çim verdayo binê Çewlîgî. Çêrme de cara nika yew maden est o. Çewlîgî rê zerarê tewr pîlî awbendî danê. Ma nêeşkenê şaristan de meyweyan wişk bikerê, îklîmê ci xeripîyayo.
Hetê bînî ra seba nê projeyî destûrê şuxilîyayîşê 26 ton dînamîtî ameyo dayene. Nê dînamîtî bêrê teqnayene herikîyayîşê awe zî do bixeripîyo, heywanî do bimirê. Eke ê wazenê herême rê hetkarîye bikerê wa çîyê faydeyînî bikerê la wa zerar nêdê xozaya ma. Wa şarê ma wayîrê xozaya xo vejîyo.''
Tuzunî vist vîrî ke ê do siba komeleyanê dewan reyde bêrê pêser, raporê ÇEDî ser o qisey bilerê û dima eşkerayîyêke bidê çapemenîye.