Enwer Yilmaz
Cuyayîşê ma de cayê ceyranî zaf bîyo
muhîm û hema vaje her gureyê ma pê ceyranî beno. Wextanêk elektirîk çîn bi û gureyî zî gorê rewşa ê wextî bîyêne.
Jenerasyonê ma wextê bê ceyranî nêdî. Ez bi xo şaristan de bîya pîl û mi dî nêdî keye de lamba, televîzyone û radyone û dolaba cemedî esta. Nika zî telefonî estê û eke ceyran cîn bo nê çîyê ke mi cor de rêz kerdê çîyêk rê nêbenê, nêşuxûlîyenê.
Nika deştan de zîret zî pê ceyranî beno û şarê ma yo citkar hêgayanê xo bi sayê ceyranî awdayîş keno. Ceyran hende kewto cuyayîşê ma hema vaje eke ceyran çîn bo cuyayîş vindeno.
No xusus de şîrketo ke ceyran peyda keno û roşeno zî cayê ci û xizmeto ke keno muhîm o.
Her çî ra ver welatê ma de ceyran zaf vay o. Xora bendawê ke semedê peydakerdişê ceyranî virazîyayê zaf ê û înan ser o tesîsê peydakerdişê ceyranî ameyî ronayîş. Ceyrano ke peyda beno roşîyeno ma û bi awayêko zaf bay roşîyeno ma. Malê ma onca tepîya roşenê ma. Na tena bi sereyê xo neheqîyêk a. Neheqî ra wetêr dizdî ya.
A bîne zî şîrketê ceyranî ke (Seba Dîyarbekirî DEDAŞ) dewlete sey îhale no kar dayo ci hem xizmetêko baş nêdano hem zî şarî rê zulum keno.
Şîrketê ceyranî seba ke deynê xo bigîro wexto ke beno wisar elektrîkê citkaran birneno. Şîrket zano ke wisar de citkarî muhtacê ceyranî yê ceyranê înan birneno û û vernîya kar-gureyê înan gêno. Xora halê citkaran orte de yo! Erdê xo remenê la peynîya-peynî zirar kenî. Benê deyndarê şîrketî û raştê zulmê înan yenî. Amed, Mêrdîn û Ruha de her serre ma şahîd benê ke ceyranê citkaran yeno birnayîş.
Wexto ke merdim faturayêka DEDAŞî erey bifîno dûrî ra ca de ceyranê merdimî birnenê. Badê ti deynê xo bidî zî to ra heqê birnayîş û akerdişî gênê. Bi rastî pereyo ke yeno girewtiş kûllî heram o.
A bîne zî wexto ke ceyranê to birîyeno ti bi rojan bê ceyran manenî. Ti telefon akenî şinî cayê înan se kenî nêkenî nênê problemê to safî nêkenî.
Ez no hewte parkêk de ronişte bîya. Merdimêk dorûverê mi ra şîyêne amêne û telefon de qisê kerdêne. Ge-ge cayê xo ra zît bîyêne, leza-lez qisê kerdêne, arêq vetêne û hêrs bîyêne. Wexto ke pêvînayîşê xo qedîna ageyra mi ser û qala derdê xo kerd.
Va: A ke mi nê şîrketê ceyranî ra anta mi na dinya de çîyêk ra nêanta. Ez mexdurê dewêka Dîyarbekirî ya. Qasê aşmîyo ke ceyranê ma hema vaje qet çîn yo. Ge esto ge çin yo. Hela sibayî esto hela şanî çin o. Trafo xeripnaye yo. Ez do rojêk bombeyêk binê trafoyî de ronî û ê biteqnî.
Mi dawet kerd, waşt wa verê mi de binuşo ro. Mêrik nişt ro û qasê nêm saete qala derdê xo kerd. Gorê vatişê ey hema her roj yeno sûke, şino DEDAŞ û mudiranê înan rê telefon keno. Dewe de dolap û makîneyê dewijanê feqîran pêro veşayê. Şîyo hetê qaymeqanî la qaymeqamî vato; ma eleqedar nêkeno û xo het ra fetilnayo. Muxdarî zî qaymeqamî ra vato, wexto ke çîyêk beno polîsê to ekîbanê ceyranî dir yenê, înan pawenê. La ti nika vanê, ma eleqedar nêkeno.
Semedo ke muxdar bi dewijî ey ra pawenê ke wa çareyêk bivîno. Mi hevalê xo yo rojnamegerî rê telefon akerd, mi numreya muxdarî da ci û înan qisê kerd. Hevalê min o rojnameger va; Sey a dewe zaf dewî estî ke mexdur ê û rîyê nê şîrketî ra perîşan ê. Semedo ke şîrket nêzdîyê hukmatî yo çew nêeşkeno înan dir serevejîyo. Hem faturayî vay yenê hem zî xizmet çin yo şarî rê. Faturayan de pereyo ke yeno dayîş nêmeyê ci şino dewlete. Yanî dewlete dest ronena ci ser.
Muxdar mi rê tesekur kerd û şi. Ez ser o zaf fikrîyaya. Şan ez şîya keye ke ceyranê ma biryayo. Ti mevaje na aşme mi deynê xo nêdayo. Mi roja bine fatura da. Heqê akerdiş û birnayîşî 45 TL. Ne pîyaz werd ne fekê ey veşa! Cayê xo de nişeno ro, semedo ke to yew faturaya xo nêda 45 TL to ra gêno. Wa pirnikanê şima ra bêro ez vajî se!