Merkezê Xeberan- Kerrayê Sûrê Amedî yê ke lîsteya Mîrasanê Dinya ya UNESCO de yê yenê cêravetene û rotene. Bi taybetî Berê Mêrdînî de texrîbatêko pîl esto. Dêsê Sûran û kerrayê ke înan ser o sembolê tîje û estareyî, ga, helî, pilingî, dimaşkilî û estorî estê binê tehlûke de yê.
Selîm Çanako ke nêzdîyê Sûran de ocaxê ci yê çayî esto vat ke şewan saetanê ereyan de merdimî yenê la ê serê sibayî pê hesîyenê ke kerrayî ameyî diznayene.
Mîmar Arîf Îpekî zî îfade kerd ke kerrayî bi zanayîşî yenê cêravetene û xebatêke de zî bale nêna antene ke Sûrê Amedî Warê Sîtî yê. Îpekî da zanayene ke dima ke Sûr de raşanayîş dest pêkerd molozê Sûran de kerrayî ameyî dîyene. Tay merdimî zî pê hesîyayî ke nê kerrayî yenê rotene. Cêravetişê kerrayanê Sûranê Amedî zî naye ra pey dest pêkerd. Îpekî vat: "Nê kerrayê ke yenê diznayene kafe û restorantan de yenê xebitnayene. Seba ke xebatê ke Sûr de yenê kerdene bêkoordînasyon ê taxrîbatî yenê meydan. Hema zî alozîya selahîyetî esta. Xebera dezgehan yewbînan ra çin a û pêro zî Sûr de xebatêka bîne kenê. Semedê nê texrîbatan bêeleqadarîye û bêkontrolî yê."
Îpekî hişyar kerd ke eke tedbîrî nêrê girewtene texrîbatêko pîl do bêro meydan û vat: "Ganî seba rotişê kerrayan cezayêka pîle bêra dayene û kontrolê nîzamîyî bêrê kerdene. Kamyew dezgeh selahîyetdar yan zî berpirsîyar o ganî o cade seba naye dest pê xebatêke bikero."