Yewna kitabê nuştoxêkê kirdkî (zazakî) bi kirdkî vejîya. Kitabo newe hetê nuştox û cigêrayox Munzur Çemî ra ameyo nuştene. Kitab bi sernameyê “Veng û Hesreta Herdê Dewrêşî” weşanxaneyê Vateyî ra vejîya.
Emegdarê ziwanê kirdkî Munzur Çemî nê kitabê xo de ca do dayo nuştayanê xo yê weçîniteyan. (Nusteyê Weçîniteyî)
Kitab hetê Înstîtuya Ziwan û Kulturê Kirmancî ke Ewropa de falîyet keno û ziwanê ma rê xizmet keno ra ame beyankerdene. Fotografê kitabî zî hetê Înstîtutîya Ziwan û Kulturê Kirmancî ra ameyî parekerdene.
MUNZUR ÇEM KAM O?
Munzur Çem, 1947 de dewa Gêxî (Cêxî/Kêxî) Qurze de ame dinya. 1980 de, çend aşmî/mengî cuntaya 12ê êlule ra ravêr, welat terk kerd, şî welatanê teberî. Sebebê nê terkerdişî kar û xebatê eyê polîtîk û karê nuştoxîye bî. A roje ra nat xerîbîye de ciwîyeno.
Munzur Çem 1970 ra bi nat meqala, hîkaye, roman û temayanê bînan de kitaban nusneno; şanik û lawikê ke mîyanê şarî der ê, înan dano arê. Temaya meqalayanê ey ekonomî, polîtîka û kultur o. Îmla û rastnustişê kirmanckî ser o kî xeylî gureyeno.
Tawo ke nuştoxî welat terk kerd, peynîya serra 1980 de şi Almanya. Ey hetêk ra karê xo yê polîtîkî ramit, hetê ra zî sey rojnamevanî gureya.
Adara 1984 de Almanya terk kerde û şî Swêd, uca îltîca kerd. Payîzê peyênê 1996î ra bi nat paytextê Almanya Berlîn de ciwîyeno.
Munzur Çem, destpêkerdişê serranê 1990 ra bi nat, karo polîtîk de aktîf nîyo. Ey giranîya xo da Nuştişî ser. Bi taybetî zî derheqê ziwan û kulturî de aktîf o. Têpiya no dem de, persa elewîtîye û rewşa elewîyan zî kar û xebata ey de cayêko muhim girewt û ewro hîna zî gêno.
Bê kitaban cîya-cîya tayê meseleyan ser o broşurê Munzur Çemî kî estê. Meqaleyî, lawikî, şanikê arêkerdeyî û hîkayeyî, hetanî ewro xeylê kovar û rojnameyan de vejîyayê û hema zî vejînê. Grûba ke çend serrîyo îmla û gramerê kirmanckî ser o gureyena (xebetêna) û Swêd de kovara Vateyî weşanena, yanî Munzur Çem Grûba Xebate ya Vateyî ra yew o
Munzur Çem xebatkarêde heqanê merdîman (mordeman) o. Kurdîstan û Tirkîya de rewşa (halê) heqanê merdîman ser o xeylê xebetîyayo.