Bajarê Swêdî Stockholm de kombîyayîşê daşinasnayîşê Partîya Welatparêzanê Kurdistanî (PWK-Swêd) ame viraştiş.
Kombîyayîş bi di qisman ame viraştiş. Qismê verênî de heval, dost û hetgirê PWKyî, temsîlkar û heyetê partîyanê siyasî yê Kurdistanî, siyasetmedar, roişinvîr û kesayetîyê dawetkerdeyî beşdar bîy.
Kombîyayîş binê Alaya Kurdistanî de û bi marşê neteweyî Ey raqîb û semedê qehremananê Kurdistanî rêz ame girewtiş.
Badê akerdişê kombîyayîşî, sey prensîb ke PWK kombîyayîşanê xo de ano ca, kombîyayîş bi qalîkerdişê zazakî dest pêkerd. Temsîlkarê PWKyî M. Selîm Uzun ronîyayîşê PWKyî û siyasetê ey bi zaravaya zazakî/ kirdkî zanayîşî dayî.
M. Selîm Uzunî qiseykerdişê xo de wîna va;
Dîwano berêz,
Mêmanê erjayeyî,
Dost û embazê delalî,
Ez nameyê Partîya Welatparêzanê Kurdîstanî (PWK) ser o şima rê bi rêz û hurmet selamîkena. Şima xeyr ameyî Kombîyayîşê Dayîşşinasnayîşê Partîya Welatparêzanê Kurdîstanî.Şima sare û çimanê ma ser ameyî! Beşdarbîyayîşê şima şeref û moral dano ma!
Mêmanê hêcayî,
Dost û embazê delalî,
Ez zaf şa û bextewar a ke ewro na salone de, bi ziwanê xo yo şîrîn û delal, xîtabî şima kena. Kongreya awankerdişê partîya ma mabênê 9-10î îlone 2023 de Dîyarbekir de virazîya. Kongreya partîya ma bi qisêkerdişê zazakî dest pêkerd. Bêguman na yew gama muhîm a. Gelo çira gama muhîm a? Belê, gamêka muhîm a, çunkî, tarîxê Kurd û Kurdîstanî de reyaverêna ke yew partîya kurdan kongreya xo bi kirdkî/zazakî dana destpêkerdiş. Ewro zî, nasalone de, ma reyna bi kirdkî/zazakî dest bi kombîyayîşê xo kenî. Reyna zî ez zaf keyfweş û bextewar a ke, Partîya Welatparêzanê Kurdîstanî no şeref û paye dayo mi ke ez bi kurdkîyaqedîm yanî bi zazakî xîtabê şima kena. Kirmanckî/kirdkî/dimilkî yanî zazakî parçeyek ziwanêkurdkî yo. Seke şima heme zanî kurdkî, yanî ziwanê miletê kurdî, ziwanêko qedîm û dewlemend o. Kirdkî/zazakî mîyanê lehçeyanê kurdkî de lehçeya tewr qedîm a. La malesefkirdkî/zazakî heta ewro zaf îhmal bîya.
Bêguman tay xususîyetê partîya ma, Partîya Welatparêzanê Kurdîstanî, estê. Ez wazenaderheqê çend xususîyetanê partîya ma de melumat bidî şima.
Partîya ma bi nameyê xo, bi programê xo, bi nîzamnameyê xo, bi amblemê xo, bi rêxistinîyaxo, bi fikr û perspektîfanê xo her het ra partîyeka newe ya. Partîya ma, Kurdîstanê Vakurî û Tirkîya de çarekerdişê persa kurd û Kurdîstanî xo rê kerda amanc û semedê caardişê heqêtayînkerdişê qederê xo yê miletê kurdî (sey federasyon, konfederasyon, xoserîye) zebat kena, mucadele dana.
Mêmanê ezîzî,
Dost û embazê delalî,
Kurdî, bi hezaran serrî yo ke Rojhelato Mîyanên û Mezopotamya de ciwîyenî. Ziwanê kurdkîbi heme lehçeyanê xo ziwanêko qedîm û dewlemend yê famîlyaya ziwananê Hînd-Ewropayo. Miletê kurdî bi ziwan, tarîx, kultur, urf û adetanê xo tarîx de û ewro komelêko biîstîqar o; grûbanê etnîkan yê bînan reyde cayo ke tira Kurdîstan vajîyeno de ciwîyeno.
Dîwano berêz,
Mêmanê qedrberzî,
Dost û embazê hêcayî,
Kurdîstan de tewrê miletê kurdî cîya-cîya etnîsîte, dîn û mezheban ra sewbîna mînorîteyê bînî zî estî. Partîya ma sey armenî, asurî-keldanî, ereb û azerîyan heme şarê ke Kurdîstan de ciwîyenî, seba ke biresê heqanê xo yê nasnameyê etnîkî, bawerî û demokratîkan û Kurdistan de azadane biciwîyê, mucadele kena.
Partîya ma, verba/duştê zîhnîyetê “yew milet, yew dewlet, yew ale, yew ziwan, yew dîn, yew mezhebî” mucadele kena. Heqê her kulturî est o ke halê xo yê xozayî de biciwîyo, aver şêro û bêro pawitiş. Partîya ma, înkarkerdiş û asîmîlekerdişê her kulturî suc vênena. Azadî, demokrasî û aştîye garantîya bingeyî ya eynî erdî ser o pîyaciwîyayîş û pêkerdişê heme şaranû kulturan ê.
Partîya ma, heme ziwan, lehçe û kulturê ke Kurdîstan de est ê seyyewbînî hesibnena. Estbîyayîşê mînorîteyan, dînan, mezheban û lehçeyan û heq û azadîya înan qebûl kena. Semedo ke her ziwan û bawerî her warê ciwîyayîşî de bê astengî biciwîyê xebitîyena û çarçewaya huqûqê cîhanşumulî de garantîkerdişê nînan mudafa kena.
Mêmanê hêcayî,
Dost û embazê delalî,
Ez tîya de bi taybetî wazena yew nuqteya muhîm ser o vinderî. Seke şima zanî Kurdîstan de di lehçeyê kurdkî estî. Kurmanckî û kirdkî/zazakî. Programê Partîya Welatparêzanê Kurdîstanî de ameyoxî ziwanî kurdkî ser o wina yew made esto:
Kurdîstan de kurdkî do bi her di lehçeyanê xo (kurmanckî û kirdkî/zazakî) biba ziwano resmî. Herêmê ke kurmanckî tede zaf yena qiseykerdiş do nê herêman de kurmanckî lehçeya sereke ba la sîstemê perwerde û dezgehanê dewlete de musayîşê kirdkî zî do mecbûrî bo. Herêmê ke kirdkî/zazakî tede zaf qisey bena do nê herêman de kirdkî lehçeya sereke ba la sîstemê perwerde û dezgehanê dewlete de musayîşê kurmanckî zî do mecbûrî bo.
Mêmanê erjayeyî,
Dost û embazê delalî,
Goreyê partîya ma ewro Kurdîstanê Vakurî de kulturê ma û bi her di lehçeyanê xo (kurmanckî, kirdkî/zazakî) ziwanê kurdkî binê tehlukeyêkê girdî de yê. No war de partîya ma, Kurdîstanê Vakurî û Tirkîya de, ewro ra û bi lezgînî semedê awankerdiş û xurtkerdişê dezgeh û sazgehanê milî, komelkî û meslekîyan, semedê pawitiş û averberdişê ziwanî û kulturî xebitîyena. Partîya ma na bawerî de ya ke semedê pawitiş û averberdişê ziwanê kurdkî ganî tedbîrê acîlî bêrî girewtiş û ganî nê warî de bi acîlî tayê projeyî bêrî amadekerdiş. Partîya ma piştî dana dezgeh, sazgeh û kesanê ke nê waran de xebitîyenî. Partîya ma keye, cayê karî û bazar de û têkilîya bi dezgehanê dewlete de timûtim qiseykerdişê kurdkî teşwîq kena. Semedê weşkerdiş û averberdişê kulturê kurdkî akerdişê kurs, komele, weqf û wendegehan teşwîq kena û nê warî de piştî dana xebatan. Partîya ma, semedo ke ziwanê kurdkî resmen bibo ziwanê perwerdeyî û tewrî tirkî ya bibo ziwano resmî û no resmîyet bi Qanûnê Bingeyî û qanûnanê bînan bêro garantîkerdiş xebat kena û mucadele dana.
Mêmanê erjayeyî,
Dost û embazê delalî,
Sîyasetê kolonyalîstî, înkar, îmha, tehcîr û asîmlasyonî yê ke Dewleta Komara Tirkîya hetanî ewro domnayê, awanîya neteweyî, demografîk û komelkî ya Kurdîstanî ser o tesîrêko zaf xurt kerdo û bîyo sebebê texrîbatanê girdan. No sîyaseto edetî yo ke dişmenîya miletê kurdî ser o awan bîyo, şertanê ewroyî de hîna xurt bîyo û dewam keno. Dewleta Komara Tirkîya, goreyê nîzamê huqûqî yê xo û qanûnanê xo yê mewcûdan zî hereket nêkena. Îdarekerdoxanê îdareyanê mehelîyan yê Kurdîstanî û parlamenteran berteraf kena, bi tayînkerdişê qeyyûman îradeyê bi milyonan raydayoxan betal kena. Partîya ma beyan kena ke: Dewleta Komara Tirkîya mecbur a goreyê qaydeyanê peymananê mîyanneteweyîyan û huqûqî hereket bika. Heq û prensîpê weçînayîş û xweçînîyayîşî, dinyaya hemdeme de heq û prensîpanê bingeyênanê winasîyan yê demokrasî ra yê ke çinê hesab nêbenê, fek ci ra veranêdeyêno û esla dewr nêbenê.
Bêguman rewşa nikayine tena zerar nêdana miletê kurdî û hetanê etnîk û dînîyan yê Kurdîstanî, hem sere de zerar dana şarê tirkan hem zerar dana pêroyê şaranê bînan ê ke Tirkîya de ciwîyenê hem zî erjanê demokratîkan. Partîya ma beyan kena ke, semedo ke no texrîbat hîna zaf nêbo û hem heme heqê însanî yê bingeyênî yê miletê kurdî hem zî heqê heme şaranê bînan yê Kurdîstanî bêrî temînkerdiş, Tirkîya de zemîneyêka demokratîke ca bigîra û na zemîne de problemî bi rayîr û metodanê aştîye û demokratîkan çare bibê, ganî telebê cêrênî bêrî ca. Partîya ma semedê naye xebitêna û mucadele kena.
Partîya ma, na bawerîye de ya ke hemkarîye û platformê ke telebanê acîlan yê miletê kurdî ser o teşkîl bibê, hem semedê caardişê îttîfaqanê demokratîkanê neteweyîyan yê demdergan hem zî demo kilm de semedê çarekerdişê persa kurd û Kurdîstanî, do bibê bingeyêko munasib û gamêka muhîme. Ganî partî û rêxistinê sîyasî, derûdor, kesê qedrberzî, dezgehê sîvîl û demokratîkî yê ke Kurdîstanê Vakurî û Turkîya de est ê semedê nê telebanê acîlan bêrî têhet û yew platformê temsîlkar yê kurdan yê hemparî teşkîl bikê ke no platform hem muzakereyanê mîyanê kurdan de hem zî muzakereyanê kurdan û muxatabanê înan de bibo teref. Partîya ma, do semedê teşkîlkerdişê nê platformî bixebitîya.
Dîwano rêzdar,
Mêmanê erjayeyî,
Embazê delalî,
Milet, welat, ziwan û kulturî ma (yanî miletê kurdî, welatî ma Kurdîstan, ziwanê ma kurdkî, tarîx û kulturî ma) verê heme çî yenî.
Reyna şima pêron rê selam û hermet kena û nameyê Partîya Welatparêzanê Kurdîstanî ser o şima rê zaf teşekur kena.
Şima heme weş û war bên!
Wa biciwîyo miletê Kurdî, wa biciwîyo Kurd û Kurdîstan!
Stokholm, 16.12.2023
Mehmet Selîm Uzun