Komîsyona Cinîyan a Partîya Azadîya Kurdistanî(PAK) : Ma 8ê adare de zî, semedê dermankerdişê birînanê erdlerzî bixebitê
Ewro 8ê Adare Roja Cinîyanê Dinya ya.
Ma emser, binê xirban û qetlîam û felaketo ke 6 sibate de bîyo, pêşwazîyê 8ê adare kenê.
Bi deshezaran şarê ma no zelzele de cuya xo vinî kerd, 150 hezarî merdimî birîndar bîyê, bi sehezaran banî xirabe bîyê, bi milyonan merdimî bê ban mendê û ca û wareyê xo terk kerdê.
Aşkereyo ke, çi bi sîyaset, helwest, kerden û rayberîya xo ya verê erdlerzî; çi zî bi îhmal, xemsarî, bêserûberî, bêorganîzasyonî û qedexe û astengîyê ke peyda bîyê; mesulîyetê veren yo esasî yê nê felaketî û qetlîamo ke erdlerz de bîyo, Dewleta Tirk bi xo ya.
Çi heyf ke senî ke her şer û têmîyanbîyayîş de mexdûrê esasî cinî yê; felaketanê tebîetî de zî mexdûrê tewr pîlî cinî yê.
6ê sibate de 11 bajaran de erdlerz bi û zafîya nê bajaran bajarê Bakurê Kurdistanî bî.
No zelzele de zî, yê ke tewr zêde zerar dîyê, mexdûr bîyê, cinî, gede, kêmendam û kesê ke emrê înan bîl bî.
Çi heyf ke her cayê dinya de û her çar perçeyanê Kurdistanî de cinî raştê teda, hêrîş, şîdet û qetlîaman yenê.
Cinîyê Kurd û Kurdistanî rastê hêrîşanê dewletanê serdestan yenê û zaf cinî zî binê teda û şîddetê camêrdanê ke keyeyanê ma, kargehanê ma, kolananê ma û her cayê cuya ma de yê yenê.
Her çendêk nîmeyê cematê Kurdistanî cinîyan ra yeno pê zî, la cinîyê Kurdan Tirkîya û Bakurê Kurdistanî de heqê perwerdeyîya ziwanê xo yê dayike ra nêeşkenê îstîfade bigîrê. Cinî heqê komelkî, ekonomî, beşdarîya cuya polîtîkî û warê heqê perwerdeyî de neheqîyêka pîle vînenê.
Wezîyetêko winasî de ma vanê, wa 8ê Adare biba roja azadkerdena ala azadîya cinîyan, wa biba roja berzkerdişê ala azadîya Kurdistanî.
Ewro hem sey cinsîyetêko bindest, hem zî sey qismêkê cematê Kurd û Kurdistanî vera şîddet, tacîz, destdergî, wêranî, neheqî û zulmê ke ma raşte ci ameyî, bi rûmetî ma vengê azadî, seyyewbînî û edaletî berz kenê.
Cinî perceyêkê komela ke ma tede cuyenê yê la ma zaf heqanê xo ra mehrum ê. Ma do rêxistin û xebatanê xo yê taybetan zî vera cîyatîya cinsî ya her qayde û vera neheqîyan vengê xo kenî berz, mucadeleyê xo domnenê
Ganî ma bizane ke, azadîya cinîyan, tarîxê nerdimatî de her wext bîya mifteyê berê azadî. Her çî ra ver gere ma naye bizane.
Hîna zî bi hezaran cinîyê Kurdên Êzidî destê DAIŞî o ke rêxistinêko terorî yo de êsîr ê.
Ma zanê û ganî ma bizane ke cinî, helqeya ewilî ya heme erc, edet, ziwan û kulturê netewî ya Kurdan ê. Cinî mabênê vizêr, ewro û sibarojî de pird ê.
Belê, azadîya cinîyan beşêk û katalîzorêk a azadîya heme beşanê komele ya etnîkî, cinsî, dînî, mezhebî û cematî ya.
Ma na hişmendî de yê ke, cinîya birêxistin, temînatê komela seypê û azad a; temînatê netewêka birexistin a.
Cinîyê Kurdan her tim bîyê hedefê dewletanê serdestsan. La cinîyanê Kurdan çi rey vera çok ronênayo. Pêruna serehewanayîş û şeranê Kurdan de cayê xo girewtê, xo ver dayê.
Ma sey cinîyanê Kurdan û Kurdistanî wayîrvejyayîşê destvistişanê federe yê Başûrê Kurdistanî û destvistişanê Rojavayê Kurdistanî sey wazîfeyêkê xo yê neteweyî, niştimanî zanenê.
Ma vanê ’’Azadî semedê Kurdistanî û Kurdistano azad de zî, azadî semedê heme şarê ma û semedê cinîyan’’.
Ewro semedê caardişê waştişanê acîl ê miletê Kurd, ganî ma heme cinîyê Kurd dest bide yewbîn û pa heme şarê Kurdistanî ma hêzê xo bike yew.
Semedê dermankerdişê birînanê erdlerzê 6ê sibate ganî ma xebatanê xo yê semedê resnayîşê ardimanê semedê mexdûrê erdlerzî bêvindertiş dewam bikê, seferber bibê.
Pa heme dej û birînanê ma yê ke semedê erdlerzê 6ê sibate de bîyê, ma roja cinîyanê dinya û roja heme cinîyanê Kurdistanî û cinîyanê dinya pîroz kenê.
Ma cinî yê, xurt ê û eşkenê!
08.03.2023
Komîsyona Cinîyan a Partîya Azadîya Kurdistanî(PAK)