Komîsyona Cinîyan a PAKî:
Serre, 1960…Ca, Komara Domînîkî…
3 wayê yewbînan; Patrîa, Mînerva û Marîa Teresa, pa mêrdeyanê xo vera dîktatorîya Rafael Trujîlloyî sere hewanay û Patrîa, na wesîle ra Hezîranê serra 1960î de, Hereketa Clandestînî da dest pêkerdiş û wayê aye ê bînî zî mîyanê herekete de ca girewtî. Rastê zaf tedayan ameyî, erzîyay zindan. Winî bi ke, aşma Teşrîna Peyêne de na hereketa înan hetê dîktatorî ra sey tehlûkeyêk amey vînayîş.
25ê Teşrîna 1960î de 3 wayî merdî. Vajîyabi ke 3 wayî qezayêka trafîkî de merdê, la rastî vejyabî orte: Înan rê tecawûz amebi kerdene û dima ra zî ameybî qetl kerdene! Hereketa înan ra dima, serrêk badê peynîya dîktatorîya Trujîlloyî amey!
Belê, rejimê Trujîlloyî ê kiştbî; la rayîrê heqanê merdiman de û bi taybetî semedê hereketa azadîya cinîyan bibî sembolêk.
Na wesîle ra serra 1999î de, hetê Neteweyê Yewbîyayî ra, 25ê Teşrîne sey “Roja Mîyanneteweyî ya Paştgirî û Têkoşînê Vera Şîdeko ke Cinîyan ser Beno” amey qebûlkerdene.
Şîdetê vera cinîyan, şîdetêko wînasîyo ke, mîyanê komelî de yan zî mîyanê keyeyî de, cinî bi hawayêko fizîkî, zayendî yan zî hetê psîkolojîkî ra rastê tehdîdî û zulum û zordarîyan yenê yan zî azadîya înan yena asteng kerdene.
Senî ke her ca de kulturê camêrdan serdest o, çi heyf ke her çar perçeyanê Kurdistanî de zî, cînîyê kurdî û Kurdistanî rastê şîdetî yene; yenê kiştene, înan rê tecawûz beno û azadîya îna yena asteng kerdene. Çi keye de, çi kargehan de û çi zanîstgehan û ûsb.
Goreyê raporê Komîsyona Cinîyan yê Komeleya Heqanê Merdiman (ÎHD) her serre bi seyan cinîyî raştê şîdetê camêrdan yenê û encamê nê hêrîşan de, bi desan cinîyî yenê kiştene, bi seyan cinîyî birîndar benê.
No raporê , bîlançoyêka girane nîşanê ma dano ke, ganî qet nêro qebûl kerdene. Ma pêro zananê ke, polîtîkaya ke şîdeto ke cinîyan rê beno, kiştoxanê cinîyan û tecawizkaran bê ceza verdena û Peymannameyê Îstanbulî orte ra wedaro nê bîlançoyî ra mesul a.
Û heto bîn ra, cinîyê kurî, tena hetê camêrdanê nas û dost û merdimanê xo ra ney, eslê xo de bi desan serrano ke hetê Dewleta Tirkîya ra rastê şîdetê mîlîtarîst, cinsî, şowen yenê. Eke şîdetê cinîyan polîtîk bo, şîdetê ser cinîyanê kurd ê sey millet ziwanê ey, estbîyayîşê ey û hem-e heqê ey yê netewî, demokratîk çîne ameyê hesibnayene û şîdetê ser cinîyanê Kurdistanî, se qat polîtîkêr.
Ma sey Partîya Azadîya Kurdistanî(PAK), vengê heme kesanê Kurd û Kurdistanî û dinya danê ke, wa her warê cuyayîşî de, bi vengêko berz vera şîdet û destdergî yê cinsî vejîyê .
25.11.2021
Komîsyona Cinîyan a PAKî