Li Stenbolê rojên danasîna bajarên cûrbecûr berdewam dike. Vê carê jî ji bo danasîna gastronomî, dîrok, xweza, çand û kultura Amedê dîdarek birêve diçe. Di çarçoveya van rojan de bi dehan kompaniyên Amedê, xwaringeh û şaredariyên navçeyan bi beşdariyeke qerebelix li Stenbolê ne. Herî zêde jî beşa ku cigercî lê bi cî bûne eleqeyeke mezin dibîne.
Minareya çar ling, zebeş, govend û cûrbecûr çêj û taybetmendiyên Amedê ne. Cîh Stenbole û parêzgerî, şaredarî û kompaniyên Amedê bo danasîna bajarê xwe Amade ne. Rojên Danasîna Amedê bi amadekariya Şaredariya Stenbolê berdewam in û ne tenê Amedî lê hejmareke zêde xelkên din jî eleqeyeke germ pê didin.
Parlamenterê CHPê yê Stenbolê Sezgîn Tanrikulu ji Rûdawê dibêje: “Amed bajarekî kulturê ye. Navenda herêmê ye. Him navenda siyasî ye û him ya kulturî ye. Divê gastronomiya bajêr li vir bihat nasandin. Ez bi vê boneyê spasiya federasyona me dikim. Ew destpêkeke û di rojên pêş de emê kêmasiyan bibînin û baştir bikin. Lê tişta ku min xemgîn dike nebûna şaredariyan e ji ber ku ew di destê qeyûman de ne.”
Arkeologê li Şaredariyê Sadik Yasîn jî got: “Amed xwedî dîrokeke 12 hezar salî ye û li cîhanê duyemîn bajar e ku niştecîbûnê lê destpêkiriye. Yekem bajar e ku cotkarî lê hatiye kirin. Ji ber wê jî diviyabû me hemû ew çand, huner û bedewî bianîna Stenbolê jî.”
Kompaniyên geştiyariyê bo ku bala geştiyaran ser Amedê ve bikşînin danasîneke berfireh a cîhûwarên siruştî û dîrokî dikin. Şaredariyên navçeyan jî bi heman mebestê satandên xwe rêz kirine û hewla wê yekê didin da bêhtir kes Amedê nas bikin.
Beşdarî Yûsûf Karabûlut jî got: “Ez ji Sîlîvriya Stenbolê hatim û bixwe ji Edeneyê me. Min her tim gelekî meraqa Amedê lê ez neçûme. Bû qismet û ez îro hatim vir.
Bala xelkê beşdar jî herî zêde li standên xwarinên xwezayî û helbet li cihê ku cerg lê dipije ye.
Hosteyê cergê Îsmaîl Demir jî got: “Cigera Amedê baş e. Miletê me giş hatine vir û li vir cigêrê dixwin. Kî hatiye ser çavan re hatiye. Me hemû tişt ji Amedê anîye.”
Li hêlekê danasîna hemû taybetmendiyên bajêr û li hêla din jî hunermendên Amedî bo beşdaran konsertan lidardixin. Tevî ku xelk ji bahayên giran bi gazinc in jî, bi deh hezaran kes seredana rojên danasîna Amedê dikin ku 3 rojan berdewam dike.
Rûdaw