Li gor rapora herî dawî ya Tora Sûrî bo Mafên Mirovan, ji Adara 2011an heta Hezîrana 2022an 14 hezar û 685 kes li Sûriyê di bin êşkencedanê de hatine kuştin, piraniya wan jî bi destê hêzên Hikûmeta Sûriyê.
Di rapora Tora Sûrî ya Mafên Mirovan de hat diyarkirin ku ji Adara 2011an heta Hezîrana 2022an 14 hezar û 685 kes li Sûriyê di bin êşkencedanê de hatine kuştin, di nav wan de 181 zarok û 94 jin hene, piraniya wan jî bi destê hêzên Hikûmeta Sûriyê hatine kuştin.
Li gor rapora navborî, li Sûriyê 14 hezar û 464 kes di nav wan de 174 zarok û 75 jin di bin êşkencedanê de û bi destê hêzên Hikûmeta Sûriyê hatine kuştin, hevdem 83 kes di nav wan de zarokek û du jin bi destê HSDê bi êşkenceyê hatine kuştin, kesên din jî bi destê Desteya Tehrîr el-Şam û grûpên çekdar hatine kuştin.
Di Adara 2022an de jî, Tora Sûrî bo Mafên Mirovan di raporekê de ragihandibû ku ji Adara 2011an heta Adara 2022an, li Sûriyê 228 hezar û 647 sivîl bi destê aliyên çekdar li Sûriyê hatine kuştin, ji wan 14 hezar û 664 kes bi êşkenceyê canê xwe ji dest dane û heta niha jî 151 hezar û 462 kes girtî ne, hevdem 14 milyon Sûrî jî malên xwe bicîh hiştine û derbider bûne.
Rûdaw