PSK, TEVGER, PAK, PDK-BAKUR, PÊLKURD:: MA ADIRÊ NEWROZE SEBA YEWITÎ Û PÎYATÎ WEBIKE!
Seke ma zanê aşma Adare bi rojanê keyfweşî û serkewtişî û bi rojanê xirab û trajedîyan tarîxê Kurd û Kurdîstanî de cayêko muhîm gêna. Ê rojan ra yew zî 21ê Adare roja Newroze ya. La çi heyf ke netewa Kurd emser zî Newroze rewşêka îstîsnayî de fîraz kena. Eger Covîd-19 astengo yewin bo, astengo diyîn zî qedexe û tedaya Dewleta Tirkîya yo.
Bêgûman Newroze serrneweya heme neteweyanê Aryanî ya. La semedê Kurd û Kurdistanîyan roşanê Newroze wayîrê cayêkê taybetî ya. Kurd û Kurdistanî hem sey roşan, hem zî sey roja serhewenayîş, xoverdayîş û tekoşînê semedê azadî û xoserîye Newroze fîraz kenê. Coka, dewletê dagîrkerî pîrozkerdişê Newroze qedexe kerdê. Wexto ke vînayê nêeşkenê vernîya pîrozkerdişê Newroze bigîrê; o wext zî waştê Newroze bikê malê xo. Bi helwest û kerdenanê xo waştê pîrozkerdişê Newroze armanc û meqsedê xo yê esasî ra dûr bivisnê û muhtewaya pîrozkerdişî sivik û bêmana bikê. Dewletê dagîrkerî û tay hêzê bînî wazenê pîrozkerdişê Newroze zeman û mekanê qedirgiranîya tarîxê netewa Kurd ra dûr bivinê û pîrozkerdişî leymin û têmîyan bikê.
Yadkerdiş û pîrozkerdişê Newroze, zemanê xo de û bi armancê xo vera dagîrkerî, zulum û zordarî bîyo sembolê xoverdayîşê neteweyî. Heto bîn ra vera înkar û asîmîlasyonî, bîyo metodê averberdiş û newekerdişê mezg û hafizeya Kurdistanî.
Newroze ewro Başûrê Kurdistanî de bi azadî pîroz beno. Bi nê minasebetî ra zî Newroze bîya îmkanê şayî û averberdişê hişmendî û bidestvistişanê Kurdistanî. Rojavayê Kurdistanî de tay bajaran de pîroz kerdişê Newroze rîyê astengî û hêrîşanê dagirkeran ra qedexe yo. Bakur û rojhelatê Kurdistanî de çi heyf ke hîna zî Newroze bi reng û vengê xo yê azad û bi armancanê xo esasî nêna pîroz kerdene.
Dewleta Îslamî ya Îranî par zaf cayanê Rojhilatê Kurdistanî de pîrozkerdişê Newroze qedexe kerdbî û amser bi îhtimalêko pîl do wina bo. La ê do nêeşkê îrade û hîsê netewa Kurd ser o qerar bidê. Adirê Newroze ke sembola azadî yo, do rojhelatê welatê ma de zî bêro wekerdene.
Bakurê Kurdistanî de dewleta dagîrkere bi heme îmkananê xo do hewl bido ke vernîya pîrozkerdişê Newroze bîgîro. La beno ke Bakurê Kurdistanî de Newroze bi armanca xo û demê xo de, rîyê covîd-19 ra kêm bo zî. Bakurê Kurdistanî de pîrozkerdişê Newroze ganî bibo wesîleya averberdişê ziwanê xo. Heto bîn ra bibo wesîleya destvistişê heqê neteweyî, komelkî û kulturî û hetêk ra bibo wesîleya bidestvistişê heqê qederê miletê Kurdî.
Kurdistanîyê ercîyayê!
Rojhelatê Mîyanênî mîyanê bedilnayîşêk de yo û merkezê bedilyayîşan de zî Kurdistan ca gêno. Hêzê dagirkerî êdî sey verî nêşkenê serwerîya xo bidomnê û netewa Kurd binê koletîye de bitepişê. Bedilyayîşê hêzanê herême û yê hêzanê dinya semedê dewaya azadiya Kurd û Kurdistanî îmkananê neweyan peyda keno û zemîne keno weş.
Îmkanê ke Rojavayê Kurdistanî de vejyayo orte, muhîmîya yewitî, hemkarî û pîyayîya neteweyî ya Kurd û Kurdistanîyan zêde ra ferz keno. Kurdî tena bi pîyayî û yewitîya neteweyî do bieşkê qezencanê xo bipawê û do semedê azadî û xoserîya Kurdistanî gamanê pîlan bierzê.
Başûrê Kurdistanî de semedê pawitişê destvistişanê federe, semedê awankerdiş, yewkerdiş û xurtkerdişê dezgeyanê dewletbîyayîşî û semedê azadî û xoserî, her çî ra ver gereke pîyayî û yewitîya heme partîyanê sîyasî yê kurdistanî bêra xurt kerdene.
Rojhilatê Kurdistanî de zî destpêkê serkewtişî, yewitîya hêzanê neteweyî yê ê perçeyê welatê ma ra vîyareno.
Bakurê Kurdistanî de semedê averberdişê hişmendîya neteweyî, niştimanî, semedê everberdişê vîr û bawerîya azadî, xelisyayîş û xoserîye gama yewine na ya ke heme hêzê neteweyî, Kurdistanî dest bidê yewbînî û semedê pîya xebate, hemkarî û îtifaqê neteweyî, niştimanî gaman bierzê.
Bi minasebetê pîrozkerdişê Newroze ganî ma teşebusanê yewitî, hemkarî û yewitîya neteweyî aver bere. Ganî ma pawitiş û hişmendî û destvistişanê neteweyî vejê ver.
Biciwîyo Newroze, sembola xoverdayîşî û tekoşînê azadî û xoserî!
Biciwîyo yewîya neteweya Kurd û Kurdistanîyan!
20.03.2021
PSK, TEVGER, PAK, PDK-BAKUR, PÊLKURD