Parêzerê malbata Jîna Emînî ragihand, malbata wê gilî Polîsê Exlaqî yên Îranê û berpirsên kuştina wê kirine.
Parêzerê malbata Jîna Emînî Salih Nîkbext îro Çarşemî ji ajansa ISNA re ragihand, “Min tevî hevkarê xwe Elî Rezayî nûnertiya dê û bavê Mehsa Emînî kir. Roja Duşemê yek ji me (Elî Rezayî) derkete pêş dozgeriya tawanan û amaje bi Birêz Şehriyarî serokê dozgeriya tawanan kir ku ji aliyê bav, bira û keça xaltiya Mehsa Emînî ve hat gilîkirin.”
Parêzerê malbata Jîna Emînî Salih Nîkbext got, “Di vê hevdîtinê de me daxwaz ji serokê dozgeriya tawanan û lêkolînerê dosyayê kir ku li gor rewşa taybet a dosyayê, lêkolînên pêwîst û berfireh ji dema desteserkirinê heta veguhestina Mehsa bo nexweşxaneya Kasrî bikin, vîdeo û wêneyên hemû kêliyên girtina wê û mayîna wê di nav polîsên exlaqî de pêşkêş bikin. Divê em bi cih bibin û mafê me yê gihandina daîmî li dosyeyê hebe.”
Jîna Emînî ya 22 salî û xelka Seqizê êvara roja Sêşema 13ê Îlona 2022an li stasyona Heqanî ya metroya Îranê ji aliyê Polîsê Exlaqê yê Tehranê ve bi hinceta pabendnebûna bi hicaba Îslamî hatibû desteserkirin û paşê bo girtîgeheke polîsan li cadeya Wezîran a Tehranê hatibû şandin.
Roja 16ê Îlonê piştî ku sê rojan li Nexweşxaneya Kesra ya Tehranê ma û di demekê de ku di komayê de bû û mejiyê wê rawestiyabû, Jîna Emînî canê xwe ji dest da.
Cinazeyê Jîna Emînî di 17ê îlonê de li welatê wê Seqizê hatibû definkirin. Piştî merasima cinaze li Tehran û bajarên Rojhilatê Kurdistanê xwepêşandanan dest pê kiribû.