Roja çarşema çûyî Hevseroka HDPyê Pervin Buldanê gotibû HDP li ser hilbijartinên herêmî digel partiyên Kurdistanî wê bicive.
Li ser vê daxuyaniyê Serokê Giştî yê Partiya Azadiya Kurdistanê Mustafa Özçelik axivî û got: Haya me ji civîneke di derbarê hilbijartinên herêmî de ku bi HDPyê re wê li dar bikeve tune ye.
Buldanê roja çarşemê 17ê Cotmehê daxuyaniyek li ser hilbijartinên herêmî da û got:
’’Weke tê zanîn HDPyê bi partîyên Kurdistanî re di hilbijartinên 24ê Hezîranê de tifaqeke berfireh nikarîbû pêk bianîya. Lê di hilbijartinên herêmî de divê em vê tifaqê pêk bînin. Di 20ê vê mehê dê bi nûnerên van partîyan re civîneke me pêk bê. Ev tifaq ji bo me gelek girînge.Divê ev yeka ne bes weke tifaqeke hilbijartinê bê dîtin.Divê herweha bi perspektîfa yekitîya netewî em vê yekê binirxînin’’
Di derbarê vê daxuyanîya Pervin Buldanê de Serokê Giştî yê PAKê Mustafa Özçelik, pirsa Rûpela Nûyê bersivand û got:
“Weke PAK haya me ji civîneke ku di derbarê hilbijartinên herêmî de ku bi HDPyê re li dar bikeve tuneye.
Lê bi îmzeya Hevserokên HDPyê Pervîn Buldan û Sezai Temelli bi nivîskî di roja 17yê cotmeha 2018an de li ser navê min dawetîyeyek gihîştîye me. Di vê dawetiyeyê de Hevserokên HDPyê dibêjin, ‘Em dixwazin bi serok û pêşengên partîyên Kurdistanî re bên cem hev û derheqê pêşveçûnên dawî yên li Kurdistanê de hizr û nêrînên xwe bi hev re parve bikin û ji bo xurtkirina têkilîyên sîyasî yên di pêşerojê de bi hevre bişêwirin. Bi beşdarbûna we ya vê civîna bi xwarin, em ê gelek şad û bi hêz bin’.
Tiştê ku ez dizanim ev dawetîye ji partîyên Kurdistanî yên din re jî hatîye şandin.
Lê tiştên ku Pervîn Bûldan ji raya giştî re behs kiriye, tu eleqeya wê bi naveroka vê dawetîyeyê re tune ye. Pervîn Buldan di daxuyanîya xwe ya di çapemenîyê de dibêje emê li ser hilbijartinên herêmî civînekê bi partîyên Kurdistanî re li dar bixin. Weke PAK haya me ji civîneke ku naveroka wê tifaq û nirxandina hilbijartinên herêmî be tune ye. Ew dawetiyeya ku hevserokên HDPyê ji me re şandîne, ne di derbarê hilbijartinên herêmî de ye.
Di derbarê hilbijartinên herêmî yê ku di Adara 2019an de dê li dar bikeve jî, sîyaseta PAKê zelal e. PAK dibêje, di hilbijartinên herêmî de partîyên sîyasî yên ji derveyî HDP û HÜDAPARê, li gel partiyên siyasî yên Kurdistanî, dezgehên sivîl û şexsîyetên etnîk, olî û mezhebî yên di civatê de cîhekî wan ên bi rûmet hene divê Platforma Namzedên Serbixwe yên Welatperwer û Demokrat ava bikin û em bi namzedên serbixwe beşdarî hilbijartinên herêmî bibin.
Herweha weke PAK ji bo beşdarbûna wê civîna ku Hevserokên HDPyê em dawet kirine jî hîna me tu biryar nedaye . HDP ya ku hîna jî ji me û ji raya giştî ya Kurdistanê re, îzahata têkbirina xwe ya tifaqa hilbijartinên 24ê Hezîranê nekiriye, gelo dê di derbarê pêvajoyê de çi bi partîyên Kurdistanî re bipeyive?"