Mustafa Ozçelîk
Seba wayîrcivejyayîşê ziwanê kurdkî, her çî ra ver ma bi kurdkî qalî bike, ma kurdkî bimuse
Celadet Bedirxan û embazê xo 15ê Gulana 1932î de hûmara yewin a Kovara HAWAR vete û heta 1943î 57 hûmarê HAWARî vejîyay.
Mûhîmîya Kovara HAWARî, na ya ke, kovara kurdkî ya verêna ke bi herfanê latînî ameya weşanayîş.
Coka, 15ê Gulane, hetê tayinan şey ‘’Roşanê Zimanê Kurdî’’, ji alîyê hinekan ve jî wek ‘’Roja Ziwanê Kurdkî’’ yeno pîrozkerdiş
Belê, roja 15ê Gulane zî mîyan de, semedê ziwanê kurdkî ( kurmancî, kirdkî/zazakî) xeylê çalakîyê cîya bi cîya benê, xebatî yenê kerdene.
Helbet ke heme çalakî û xebatê ke semedê ziwanê kurdkî benê, pîroz ê û ganî ma paştî bide înan.
Labelê goreyê mi, pa nê xebat û çalakîyan, nika semedê ziwanê kurdkî her çî ra ver ganî ma çar çîyanê esasîyan bîyarê ca.
A yewine: Her kurdo ke bi kurdkî nêzano, ganî kurdkî bimuso. Her keyeyê Kurdan ganî gedeyanê xo rê ziwanê xo bimusno; ganî mîyanê keyeyê xo de û herwarê cuyayîşî de ma kurdkî qisey bike.
A diyîne: Qasê a gama yewine, çîyêko bîn o muhîm esto ke, çi heyf kem a peygoş kenê. Belê, genî ma bieşkê her serre 200.000 gedeyanê kurdan dersa weçînitî ya kurdî rê qeyd bike. Semedê 200.000 hezar gedeyan do tewr kêmî lazimtîya bi 2000 mamosta û bi milyonan kitabê derse bibo. Gelo no tu heyecanêk nêdano şima?
Nê her di gamî, do rayîrê bi dest vistişê heqê perwerdeyîya bi kurdkî û musayîşê ziwanê kurdkî abikerê û xurtêr bikê.
A hîrêyîne: Ganî xebatêka hîra bêra kerdene ke ziwanê kurdkî bibo ziwanê resmî û perwerdeyîya bi ziwanê kurdkî bêra qebûl kerdiş û Qanûnê bingehînî û pêroyê yasayanê eleqedar de no heq bêro garantî kerdiş.
A çarîne: Ganî heme şaredarîyê Kurdistanî pa tirkî, kurdî (kurmancî, kirdkî/zazakî) sey ziwanê fermî yê şaredarîye bikar bîyarê. Kreşanê gedeyan ê bi kurdkî û dibistananê bi kurdkî abikerê. Heme dezgehê sivîlî û meslekî yê Kurdistanî zî semedê cardişê qiseykerdiş û musayîşê ziwanê Kurdî bibê seferber ke, wa metod û îmkanê muhîmî bêrê awankerdiş.
Belê, nê her hîrê gamî, do sîstemê asîmîlasyonî bi hawayêko bihêz birijnê, do rayîr akerê ke bi milyonan kurdê ke bi kurdkî nêzanê bieşkê bi kurdî qisey bikê.
Kurdkî estbîyayîşê miletê kurd o, heykelê netewetîya ma ya. Semedo kem a bieşkê verê zorî û asîmîlasyono ke kurdkî ser o beno bigîrê, bêne ma pê caardişê nê her çar gaman dest pêbike.
15.05.2024
Mustafa Ozçelîk
Serekê Pêroyî yê Partîya Welatparêzanê Kurdîstanî (PWK)