Serokê Herêma Kurdistanê Nêçîrvan Barzanî pêşwaziya Balyoza Amerîkayê ya li Bexdayê kir û got "Divê Iraq di derbarê çawaniya birêvebirinê de xwedî nêrîneke hevbeş be."
Serokê Herêma Kurdistanê Nêçîrvan Barzanî pêşwaziya Balyoza Amerîkayê ya li Bexdayê Alina Romanowski û şanda li gel kir.
Li gorî daxuyaniya Serokatiya Herêma Kurdistanê di hevdîtinê de mijarên weke hevdîtinên Serokê Herêma Kurdistanê Nêçîrvan Barzanî li gel aliyên siyasî û berpirsan di serdana xwe ya dawî ya Bexdayê de, erkê bihêzkirina peywendiyên navbera Hewlêr û Bexdayê ku li pêş Hikûmeta Federal a Iraqê ye û çareserkirina pirsgirêkên di çarçoveya destûrê û pêşxistina têgihiştineke hevbeş di navbera Bexda û Hewlêrê de hate gotûbêjkirin.
Di hevdîtinê de her wiha tekezî li ser giringiya hevkariya di navbera partiyên siyasî yên li welat hat kirin û bal hat kişandin ser girîngiya dayîna derfetan û piştgirîkirina hikûmeta nû ji bo çareserkirina pirsgirêkan.
Di civînê de rewşa dawî ya Şengalê jî hate nirxandin ku divê peymana ku di navbera Herêma Kurdistanê û Hikûmeta Federal a Iraqê de hatiye îmzekirin bê cîbicîkirin, li navçeyê asayîbûn bê kirin û di vî warî de tedbîrên pêwîst bên girtin da ku penaber karibin vegerin malên xwe.
Herwiha Nêçîrvan Barzanî tekez kir ku eger têgihîştin û nêrîneke hevbeş li ser çawaniya birêvebirina saman û dewlemendiyên sirûştî yên Iraqê hebe, dê xizmetguzariya welatiyan baştir bê kirin û ev yek jî dibe sedema aştî û aramiya welat.
Di berdewamiya civînê de mijarên weke dabînkirina ewlehiya sînor û giringiya xebata hevbeş a Hewlêr û Bexdayê li ser vê mijarê, curbecurkirina çavkaniyên enerjiyê, kişandina sermayedarên biyanî bo Iraq û Herêma Kurdistanê, yekkirina Hêzên Pêşmerge, peywendiyên Iraqê bi welatên cîran û navçeyî hat gotûbêj kirin.