Serokê Herêma Kurdistanê Nêçîrvan Barzanî li ser peymana ku di navbera Mezlûm Ebdî û Ehemd Şer de hatiye îmzekirin got, “Ev peyman ji bo paşeroj û qonaxeke durist a derbasbûnê nexşerêyeke guncaw e.”
Fermandarê Giştî yê Hêzên Sûriyeya Demokratîk (HSD) Mezlûm Ebdî û Serokkomarê Demkî yê Sûriyeyê Ehmed Şer şeva borî peymanek îmze kir.
Serokê Herêma Kurdistanê Nêçîrvan Barzanî derbarê wê peymanê daxuyaniyek da.
Nêçîrvan Barzanî ji bo îmzekirina peymanê Mezlûm Ebdî û Ehmed Şer xelkê Sûriyeyê pîroz kir û diyar kir ku ew peyman ji bo paşeroja Sûriyeyê nexşerêyeke guncaw e.
Daxuyaniya Nêçîrvan Barzanî wiha ye:
“Em ji bo lihevkirina di navbera birêz Serokê Sûriyeyê û Fermandarê Hêzên Sûriyeya Demokratîk (HSD) de pîrozbahiyê li birayên xwe yên li Sûriyeyê dikin ku nexşerêyeke guncaw ji bo paşerojê û qonaxeke rast a derbasbûnê pêk tînin.
Pêşwaziya Sûriyan ji vê rêkeftinê wekî hemû gelên herêmê rengvedana xwestina wan a ji bo aramî û çareseriya aştiyane ya dûr ji tundiyê ye.
Di wê demê de ku em vê peymanê pêşwazî dikin, em piştgiriya temam a Herêma Kurdistanê ji bo aramiya Sûriyeyê dubare dikin.
Her wiha em li ser pêwîstiya parastina mafên hemû pêkhateyên Sûriyeyê û beşdariya wan a aktîf di avakirina Sûriyayeke azad û pêşketî de tekez dikin.”
Xalên peymana Ebdî û Şer ev in:
1- Garantîkirina mafê hemû Sûriyeyiyan di nûnertî û beşdariyê di pêvajoya siyasî de û di hemû saziyên dewletê de li gorî pisportiyê bêyî ku girêdana wan a olî û etnîkî di ber çavan re were derbaskirin.
2- Civaka Kurdan di dewleta Sûriyeyê de civakeke resen e û dewleta Sûriyeyê mafê wan ê hevwelatîbûn û hemû mafên wan ên destûrî misoger dike.
3- Agirbesta li seranserê axa Sûriyeyê.
4- Tevlîkirina hemû saziyên sivîl û leşkerî yên li bakurrojhilatê Sûriyeyê di çarçoveya birêveberiya dewleta Sûriyeyê de, di nav de deriyên sînorî, firokexane, zeviyên petrol û gazê.
5- Garantîkirina vegera hemû koçberên Sûriyeyî ku biçin gund û bajarên xwe û parastina wan ji aliyê dewletê ve.
6- Piştgiriya dewleta Sûriyeyê di rûbirûbûna bermayiyên Esed û hemû wan gefên ku ewlehî û yekparçeyiya axa wê tehdît dikin.
7- Redkirina daxwazên parçekirin û helwestên kîndarî û hewldanên derxistina tevliheviyan di navbera pêkhateyên civaka Sûriyeyê de.
8- Komîteyên birêvebirinê dê kar ikin û hewl didin ku peyman were bicihkirin bi rengekî ku heta dawiya vê salê derbas neke.”